Dr Regionali Naturpark Lothringe

Dr Regionali Naturpark Lothringe (franzöösisch Parc naturel régional de Lorraine) lit in dr franzöösische Region Lothringe in de Departemänt Meuse, Meurthe-et-Moselle und Moselle.

S Logo vom Naturpark

Geografii

Dr Park bestoot us zwäi Gebiet, wo vonenander drennt si. Dr westlig Abschnitt wird vo de Flüss Maas und Mosel begränzt und chunnt im Süde bis öbbe zur geografische Bräiti vo Nancy, im Norde bis zu dere vo Metz. Dr östlig Abschnitt umfasst s Gebiet zwüsche Seille und Saar westlig vo Sarrebourg.

D Parkverwaltig

D Parkverwaltig het iire Sitz z Pont-à-Mousson (48° 54′ 28″ N, 6° 3′ 21″ O48.9077777777786.0558333333333).

Dr Naturpark isch 1974 gründet worde, umfasst e Flechi vo öbbe 220'000 Hektare und en Iizugsgebiet mit öbbe 72'000 Iiwooner in 193 Gmäinde. Acht Zuegangsort si mit em Park assoziiert, wo usserhalb vom Park lige:

West-Abschnitt: Commercy Jarny Pont-à-Mousson Saint-Mihiel Toul

Ost-Abschnitt: Château-Salins Dieuze Sarrebourg

Landschafte

Im westlige Abschnitt isch dr Höhezug Côtes de Meuse, wo östlig dr Maas nooch goot. Er isch vo dichte Wälder bewaggse, wäärend dr Höhezug zum Daal vo dr Mosel (Côtes de Moselle) eender agrarisch, vor allem für e Wiibau gnutzt wird. Drzwüsche lige die markante Ebene vo Woëvre und Haye, wo bsundrigs vo iirem chalchhaltige Undergrund brägt si. Do het s rund um e Lac de Madine au e baar Füüchtgebiet.

Im östlige Abschnitt dominiert s Seägebiet Pays des Étangs mit de groosse Seä Étang de Lindre, Grand Étang de Mittersheim und Étang de Gondrexange, wo au vom Schifffaartskanal Canal de la Marne au Rhin und em Saarkanal, wo im See abzwigt, durflosse wird. Witer westlig lit d Landschaft Salzgau (Pays du Saulnois), wo früener Salz abbaut worden isch, was em Gebiet si Naame gee het.

Lääbensrüüm

Im Park het s e Hufe Füechtgebiet mit Bäch und Flüss, aber au Seeè, Däich und Sümpf. Bemerkenswärt isch, ass es salzhaltigi Dümpel git. Do waggst en endemischi Form vom Öiropäische Kweller (Salicorne de Lorraine). E Hufe Moorpflanze, Schilf und Füechtmattene si en ideale Lääbensruum für e vilfältigi Fauna.

Uf 34 Brozänt vom Gebiet stoot Wald, wo vor allem Bueche und Äiche waggse.

Uf de gröössere Ebene waggst Chalchdrocherase, wo bsundrigs de Pflanze, wo d Wermi gärn häi wie Orchideä und Enziangwäggs, günstigi Lääbensbedingige bietet und au de Insekte wie dr Gottesaabätere, dr Bärg-Zikade und Reptilie wie Schlange und Äidäggse.

E Hufe Arte vo Fläädermüüs lääbe in ehemoligi milidäärischi Aalage und Höölene.

Seenswürdigkäite

S Monumänt vo Montsec

• Dr Hügel vo Montsec

Dr Hügel vo Montsec (fr: Butte de Montsec) befindet sich uf em Territorium vo dr Gmäind Montsec, wo aber gnau ggnoo en Exklave isch und nit zum Beriich vom Naturpark zelt. Uf em Spitz vom Hügel, uf ere Hööchi vo 377 Meter, befindet sich e Monumänt zum Gedänke an d Offensive vo dr amerikanische Armee gege Saint-Mihiel im Erste Wältchrieg. S Dänkmol isch as Monument historique klassifiziert.

• D Burg vo Pierrefort

D Burg vo Pierrefort (fr: Château fort de Pierrefort) isch vom Pierre de Bar 1306 baut worde. Si lit hüte im Gebiet vo dr Gmäind Martincourt und mä cha Räst vo dr Iifriidig gsee, e deckte Weergang, Portalvorbaute und rundi Dürm.

• S Akwedukt über d Mosel

S Akwedukt, wo früener Metz vo Gorze us mit Wasser versorgt het, isch e röömischs Akwedukt, wo gegen e Aafang vom zwäite Joorhundert baur worde isch. Es isch as Monument historique klassifiziert.

• 
  Blick vom Hügel vo Montsec uf d Côtes de Meuse
• 
  dr Étang de Lindre
• 
  s römische Akwedukt bi Ars-sur-Moselle
• 
  d Mosel bi Pont-à-Mousson

Weblingg

• dr regionali Naturpark Lothringe (franzöösisch, englisch un dütsch)

Dä Artikel basiert uff ere fräie Übersetzig vu dere Version vum Artikel „Regionaler_Naturpark_Lothringen“ vu de dütsche Wikipedia. E Liste vu de Autore un Versione isch do z finde.