Gschichtligi Restauratione

Mit em historische Fachbegriff Restauration (vo latiinisch restaurare‚ 'wiiderherstelle‘), bezeichnet me allgemein d Wiiderherstellig vom ene politische Zuestand, im Allgemeine d Wiideriisetzig von ere alte Dynastii, wo im Lauf von ere Revolution entmachdet worde isch. Gmeint isch usserdäm d Wiiderherstellig von ere legitime Herrschaftsform, wo vorübergehend dur inneri oder üsseri Iiflüss oder Gwaltawändig underbroche worden isch, d Rekuperation (‚Wiidergwünnig‘). Hingege bezeichnet mä d Wiideriisetzig von ere Herrschaftsform, wo ihr Asehe wäge früehnere Ereignis verlore het oder wo im ene Land kei Tradition het, as Instauration.

Dr Name Restauration chunnt vom Titel vom Hauptwärk vom Schwiizer Staatsrächtler Karl Ludwig von Haller, Die Restauration der Staatswissenschaft oder Theorie des natürlich-geselligen Zustandes der Chimäre des künstlich-bürgerlichen entgegengesetzt (1816–1842). Währed bim Haller dr Begriff no positiv gsi isch, het er no im 19. Johrhundert jede guete Klang verlore und isch bald nume no mit Reaktion gliichgsetzt worde.

Dr Fürst vo Metternich, Photographischi Reproduktion vom ene Gmäld vom Sir Thomas Lawrence, öbbe 1815, Usschnitt

Im Bsundere verstoht mä under Restauration d Zit vom Vormerz in de europäische Staate, also d Zit noch em Wiener Kongräss 1815 bis zur Merzrevolution vo 1848/49. D Chraft, wo d Restauration aadriibe het, isch dr Fürst vo Metternich gsi. In die Zit fallt au d Restauration in dr Schwiiz, wo aber scho 1831 in zwölf vo siine Kantön dr Siig vo dr Idee vo dr Volkssouveränität und vom Verfassigsstaat und dr Afang von ere liberale Regeneration erläbt het. Dä Brozäss isch 1848 mit der Iifüehrig von ere liberale Verfassig krönt worde.

Mänggisch sait me au dr Zit noch 1848 z Dütschland Restaurationszit. Wiiter verbreitet isch allerdings dr Begriff Reaktionsära.

Restaurativi Tendänze cha me noch em Wiener Kongräss fast in ganz Europa feststelle. Ängland isch en Usnahm wäge siiner Vorgschicht, dört isch d Revolution (Glorious Revolution) scho 1688 bassiert und die soziale Usenandersetzige am Afang vom 19. Johrhundert si in dr Form vo Arbetskämpf und Parlamentsdebatte usdrait worde, und so isch s au eini vo de wenige Natione in Europa gsi, wo 1948 kei Revolution stattgfunde het.

Restauratorischi Ereignis

Bekannti restauratorischi Ereignis si d Restauration vom Huus Stuart z Ängland (1660–1688), oder d Restauration vo de Bourbone z Frankriich (1814/15–1830). Z Japan bezeichnet d Meiji-Restauration dr politisch Umbruch im Johr 1868.

Literatur

Karl-Georg Faber: Deutsche Geschichte im 19. Jahrhundert. Restauration und Revolution von 1815 bis 1851. Verlag Athenaion, Wiesbaden 1971, ISBN 3-7997-0721-2 (Handbuch der deutschen Geschichte).
Karl-Georg Faber: Die Rheinlande zwischen Restauration und Revolution. Probleme der Rheinischen Geschichte von 1814-1848 im Spiegel der zeitgenössischen Publizistik. Steiner, Wiesbaden 1966.
Walther Hubatsch: Stein-Studien. Die preußischen Reformen und des Reichsfreiherrn Karl vom Stein zwischen Revolution und Restauration. Grote, Köln 1975, ISBN 3-7745-6336-5 (Studien zur Geschichte Preussens; 25).
Robert A. Kann: Die Restauration als Phänomen in der Geschichte („The problem of restoration“). Verlag Styria, Graz 1974, ISBN 3-222-10779-3.
Dieter Langewiesche: Europa zwischen Restauration und Revolution. 1815–1849. Oldenbourg Verlag, München 2007, ISBN 978-3-486-49765-6 (Oldenbourgs Grundriß der Geschichte; 13).
Gerhard A. Ritter u. a. (Hrsg.): Historismus und moderne Geschichtswissenschaft. Europa zwischen Revolution und Restauration; 1797–1815. Steiner, Stuttgart 1987, ISBN 3-515-04254-7.

Weblingg

Dä Artikel basiert uff ere fräie Übersetzig vu dere Version vum Artikel „Restauration_(Geschichte)“ vu de dütsche Wikipedia. E Liste vu de Autore un Versione isch do z finde.