Ricardo Lumengo
Dr Ricardo Lumengo (* 22. Februar 1962 z Lussenga, Uíge, Angola) isch e Schwyzer Bolitiker. Är isch am 21. Oktober 2007 bi dr Schwyzer Parlamäntswahle as zweite Schwarze (noch dr Tilo Frey 1971–1975) un as erschte ehmolige Asylbewärber in dr Nationalrot gwehlt wore.
Biografii
ändereDr Ricardo Lumengo isch im Alter vu 20 Johr us syym Geburtsland Angola gflichtet, wel er as bolitisch aktive Studänt verfolgt woren isch, un isch 1982 as Asylbewärber in d Schwyz chuu. E baar Johr speter het er d Ufenthaltsbewilligung iberchuu un 1997 dr Schwyzer Bass. Är het an dr Universitet Friiburg Rächtswisseschafte studiert un schafft hite as juristische Beroter am interkulturälle Begegnigszäntrum Multimondo z Biel.
Dr Lumengo isch ledig un Vater vu zwei Chinder, wu mit ihre Mueter z Afrika läbe. Är schwätzt acht Sproche (Franzesisch, Dytsch, Portugisisch, Änglisch, Spanisch un drej afrikanischi Sproche: Kikongo, Kikongo ya Leta un Lingála).[1]
Bolitischi Karriere
ändereDr Lumengo isch vu 1996 bis zue syym Uusdritt 2010 Mitgliid vu dr SP Schwyz gsi. Anne 2004 isch er in dr Stadtrot vu syyre Wohngmei Biel gwehlt wore un 2006 in dr Gross Rot vum Kanton Bärn. Im Spotsummer 2007 isch dr Lumengo schwyzwyt bekannt wore, wel er bin ere Sitzig vum Bieler Stadtrot Delegierti vu dr Freiheitspartei, wu a m rächte Rand bolitisiert, demonschtrativ Banane un Mohrechepf gässe un Afffelut vu sich gee gha hän go dr Lumengo verhehne. D Freiheitspartei het e Zämmehang mit em Lumengo bstritte.[2][3]
Bi dr Nationalrotswahle 2007 isch dr Lumengo as erschte ehmolige Asylbewärber in dr Nationalrot gwehlt wore. Noch dr Tilo Frey isch dr Lumengo derzue dr zweit schwarz Nationalrot iberhaupt.
Syt syyre Wahl in dr Nationalrot isch dr Lumengo mehfach Opfer vu rassistische Ibergriff gsii. An syyre 1.-Mai-Red z Langethal sin Banane uf dr Lumengo ghejt wore.[4] Im Oktober 2008 het e ne Mitglid vu dr Bartei vu National Orientierte Schwyzer uf dr Websyte beleidigt, indäm er dr Lumengo e «bunte Parlamentarier» un «ignorant» gnännt un näb em Text e Karikatur mit eme Aff un ere Banane platziert het.[5]
Vorwurf vu Wahlfelschig un Freispruch
ändereEm Ricardo Lumengo isch vorgworfe worde, är heb bi dr Grossrotswahle un bi dr Nationalrotswahle 47 Wahlzeetel sälber uusgfillt. Dr Lumengo bstrytet e Wahlfelschig, akzeptiert aber dr Verdacht uf Stimmefang. Är heb no syyre Aasicht nume Nejwehler ghulfe, wu bim Uusfille vu dr Wahlzeetel iberforderet gsii seje.[6][7] Am 11. November 2010 isch dr Lumengo vor em Bezirksgricht z Biel wäge Wahlfelschig verurdeilt wore. Drotz ass syy Aawalt verchindet het, ass er Beruefig wett yylege, hän di Sozialdemokratisch Bartei vum Kanton Bärn un d SP Schwyz dr Lumengo ufgforderet, syy Nationalrotsmandat abzlege.[8][9] Dr Lumengo het sich entdyscht zeigt iber di vorschnälle Ruckdrittsforderige vu syyre Bardei un isch us dr SP uusdrätte.[10][11] In zweiter Instanz isch dr Lumengo vom Bärnische Obergricht am 18. Mai 2011 vom Vorwurf vo dr Wahlfelschig freigsproche worde.[12][13] Gege dä Freispruch het di bärnisch Generalstaatsaawaltschaft Bschwärd yygee, dodermit isch dr Vorwurf vor s Bundesgricht chuu. Des het im Februar 2012 in eme aistimmig gfassten Urdail dr Freispruch bstetigt un d Bschwärd zruckgwise. S Bundesgricht het uffig gloo, eb Stroftatbstand vum Stimmefang erfillt sei, wel bi däm Delikt Verjehrig yydrätte sei. Dodermit giltet dr Lumengo letschtinschtanzlig as uuschuldig.[14][15]
Sunschtigs
ändereIm Juni 2007 het dr Lumengo bimene riskante Iberholmanever e Leitplanke bschedigt un het des nit bi dr Bolizei gmäldet. Dodruf isch em Fahrerflucht vorghalte wore, vor allem d Freiheitspartei het massivi Kritik wäge däm Vorfall giebt. Dr Lumengo isch fir des Vergoh verurdeilt wore.[16]
Weblink
ändere- Ricardo Lumengo uf dr Websyte vo dr Bundesversammlig
- Stolz, erster Schwarzer zu sein (Site cha nüme abgrüeft wärde; Suche im Webarchiv) , (Bieler Tagblatt, 23. Oktober 2007)
Fuessnote
ändere- ↑ No dr Aagabe uf syyre Websyte, Archivierte Kopie. Archiviert vom Original am 25. Februar 2010; abgruefen am 12. November 2010. un no Lumengo will kein Anti-Blocher sein (Tagesschau)
- ↑ abendblatt.de: Die Schweiz und das Problem mit den schwarzen Schafen
- ↑ SF Tagesschau: Lumengo will kein Anti-Blocher sein Artikel vum 23. Oktober 2007
- ↑ 20min.ch: Bananenwurf: Suche nach «junger, blonder Frau» Archivlink (Memento vom 1. April 2010 im Internet Archive), vum 5. Mai 2008
- ↑ 20min.ch: Ricardo Lumengo als Affe verunglimpft Archivlink (Memento vom 27. April 2010 im Internet Archive), vum 13. November 2008
- ↑ SF Tagesschau: Wahlmanipulationen: Rücktritt für Ricardo Lumengo kein Thema
- ↑ tagesanzeiger.ch: Lumengo gesteht: Wahlzettel selbst ausgefüllt
- ↑ Ricardo Lumengo schuldig gesprochen (Tagesanzeiger, 12.11.2010)
- ↑ Auch die Landespartei will Lumengo nicht mehr (Tagesanzeiger, 12.11.2010)
- ↑ Lukas Mäder: Ich bin von der SP enttäuscht. 20min.ch, , abgruefen Format invalid.
- ↑ Matthias Chapman: Pioniere unter spezieller Beobachtung. Tages-Anzeiger Online / Newsnetz, , abgruefen Format invalid.
- ↑ sda: Lumengo hat keine Wahlfälschung begangen. Bieler Tagblatt Online, 18. Mai 2011, abgruefen am 18. Mai 2011. (Site cha nüme abgrüeft wärde; Suche im Webarchiv)
- ↑ sda/stom/coro: Nationalrat Lumengo freigesprochen. SF Tagesschau, 18. Mai 2011, abgruefen am 18. Mai 2011.
- ↑ sda/zinv: Bundesgericht bestätigt Lumengos Freispruch. SF Tagesschau, 10. Februar 2012, abgruefen am 10. Februar 2012.
- ↑ fel: Ricardo Lumengo vom Bundesgericht freigesprochen. NZZ Online, 10. Februar 2010, abgruefen am 10. Februar 2010.
- ↑ Bieler Tagblatt Online: «Bieler Grossrat meldet Autounfall nicht»
|
Dä Artikel basiert uff ere fräie Übersetzig vum Artikel „Ricardo_Lumengo“ vu de dütsche Wikipedia. E Liste vu de Autore un Versione isch do z finde. |