Roger Pfund

Dr Roger Pfund (* 28. Dezämber 1943 z Bärn; † 16. Meerz 2024; haimetberäächtigt in dr Lengg) isch e Schwyzer Graafiker un Graafikdesigner gsii.

Lääbe un Wäärch

Dr Roger Pfund isch as Suun vun eme Schwyzer un ere Franzeesi z Bärn uf d Wält chuu un zwoosproochig ufgwagse. In syre juuged het er gmoolt un Jazz-Kontrabass gspiilt. Anne 1958 het er mit Kamraade zäme ne Jazztrio grindet un isch semiprofessionäll ufdrätte. No dr Matura het er 1963 e Graafikerleer bim Kurt Wirth un druf 1963 bis 1966 e Uusbildig zum Graafiker an dr Chunschtgwäärbschuel z Bärn gmacht. In dr Joor 1966, 1967 un 1968 het er s Aidgnessisch Stipändium fir aagwändti chunscht iiberchuu. Vu 1969 bis 1979 het er mit dr Elisabeth Pfund (1946–2006), ere uusbildete Ballettdänzeri un Graafikeri un sy speeteri Frau, chinschtlerisch zämegschafft. Ab 1976 het er mit em Jean-Pierre Blanchoud zämegschafft, speeter mit dr Sophie Jordi-Pfund, syre zwoote Frau.

1970/1971 hän dr Roger un d Elisabeth Pfund am Wettbewäärb fir e Entwuurf vu neie Banknote mitgmacht. Wel si d Schwyzerisch Nazionaalbank aber am Änd fir d Note vu Ernst & Ursula Hiestand entschiide het, sin d Entwiirf vum Roger un dr Elisabeth Pfund nume fir d Gstaltig vu dr Reserveserie vu dr Banknote bruucht woore (di sognännt sibt Emissioon). Anne 1972 sin d Entwürfe für neue Banknoten der Schweizerischen Nationalbank uf dr Documenta 5 z Kassel in dr Abdailig Parallele Bildwelten: Gesellschaftliche Ikonographie zeigt woore.

S Graab vum Pfund uf em Cimetière des Rois z Gämf

Dr Roger Pfund het au anderi Banknotenserie entwoorfe, unter anderem di letscht Banknoteserie vu Frankryych (1982 bis 1997), Malaysia (2007), di argentiinisch Banknote mit em Portrait vu dr Evita Peron (2009/2010) un di aktuäll Banknoteserie vu dr Komoore. Derzu isch er ain vu 29 Chinschtler*ne, wu zäme mit em Robert Kalina en Entwuurf zum Euro yygee ghaa hän (1996 1. Bryys vu dr Jury). Dr Pfund het au dr nei Schwyzer Raisebass gstaltet, wu syter 2003 im Umlauf isch.

Är isch syt 1981 Mitgliid vu dr Alliance Graphique Internationale (AGI) gsii. Är het au as Mooler, chinschtlerische Graafiker, Fotograaf un Illuschtraator gschafft.

Ab 1971 het er z Gämf gläbt, wun er ab 1970 s Atelier Roger Pfund Communication visuell SA ghaa het, bis er anne 2016 s Atelier wäge Iberschuldig het mieße zuemache. Zletscht het er in dr Lengg im Simmetal gläbt.

Uuszaichnige

• 1999: Prix du Rayonnement franç. für Gesamtschaffen
• 2002: Officier de l'Ordre des Arts et des Lettres

Uusstellige

Ainzeluusstellige:

• 1999 Paris, Centre cult. suisse
• 2008 Peking, Today AM
• 2009 Basel, Gal. Ficher Rohr (K)
• 2015: Roger Pfund: Dimension absurde, Museum Wiesbaden.

Gruppenuusstellige:

• 1972 Kassel: documenta (mit dr Elisabeth Pfund)
• 1982-1983 Genf, MAH: Cult. affichée (K)
• 1985 Lausanne, MAD: Quatre expressions graph. d'une décennie (mit Aeschlimann, Paul Brühwiler, Werner Jeker; K)
• 1992 Dakar: Biennale (K).

Literatuur

• Uusstelligskataloog: documenta 5. Befragung der Realität – Bildwelten heute. Katalog (als Aktenordner) Band 1: (Material); Band 2: (Exponatliste); Kassel 1972.
• documenta Archiv (Hrsg.): Wiedervorlage d5 – Eine Befragung des Archivs zur documenta 1972. Kassel/Ostfildern 2001, ISBN 3-7757-1121-X.
• Roger Pfund, Jean-Christophe Ammann: Tome III. Orell Füssli, Zürich 2006, ISBN 3-280-05209-2.
• Christine Rohrschneider: Pfund, Roger. In: Allgemeines Künstlerlexikon - Internationale Künstlerdatenbank - Online. Hrsg. Andreas Beyer, Bénédicte Savoy und Wolf Tegethoff. K. G. Saur, Berlin/New York 2021. (Online)

Weblink

 Commons: Roger Pfund – Sammlig vo Multimediadateie

• Literatur vu un iber Roger Pfund im Katalog vu dr Dütsche Nazionalbibliothek
• Websyte vum Roger Pfund
• Materialien von und über Roger Pfund im documenta-Archiv
• Schwyzerischi Nazionaalbank: Siebte Banknotenserie (1984)
• Pfund, Roger. In: Sikart (Lexikon un Datebank zue dr Chunscht in dr Schwyz un im Firschtetum Liechtestei).
• Kunst und Banknoten: Ein Nachruf auf Roger Pfand, NZZ, 18. Meerz 2024