Rosmerta

D Rosmerta isch e Göttin vo de Kelte, wo im östliche Gallie vorchunnt, bsundrigs bi de Lingone und Treverer.

d Rosmerta mitem Mercurius

d Verbraitig vo de Rosmerta (rot), Atesmerta (blau) und Cantismerta (grüe)

Vereerig

D Rosmerta werd zäme mitem gallische »Merkur« verert. Dargstellt werd si mitere Opferschale und emene Füllhorn, mengisch trait si au d Zaiche vom Merkur, de Caduceus oder de Geldbüütel. D Ikonographi zaigt dütli, as d Rosmerta d Göttin vom Riichtum isch.

E gallischi Inschrift ufere Schüssle luutet: E... IEVRI RIGANI ROSMERTIAC »E... het gstiftet a de Rigana und Rosmerta«.

Atesmerta und Atesmerius

De Name Rosmerta isch Gallisch und bidütet »Grossi Schützeri«. En Inschrift us Le Corgebin nennt d Göttin Atesmerta »Starchi Schützeri« und en Inschrif us Meaux chennt de Gott Atesmerius. Well en Inschrift us Poitiers em MECVRIO ADSMERIO gwidmet isch, cha agnoo werde, as d Atesmerta und d Rosmerta identisch sind.

Cantismerta

En Inschrift us Lens im Wallis isch a de CANTISMERTA gwidmet, doch cha nünt öber die Göttin gsait werde.

Harry Potter

Bim Harry Potter chunnt e Madame Rosmerta vor.

Link

CIL XIII, 11696 E Bild mit Inschrift vom Mercurius und de Rosmerta.

Büecher

• Bernhard Maier: Lexikon der keltischen Religion und Kultur. Kröner, Stuttgart 1994. ISBN 3-520-46601-5
• Jan de Vries: Keltische Religion. Bern 2006, ISBN 3-905581-20-5