Rudolf von Altenburg

Der Rudolf vo Alteburg, wo öppe anne 990 uf d Wält cho und öppe 1063 gstorben isch, isch e Graf us der früeche Gschicht vo de Habsburger gsi. Me säit em drum i der Gschicht, wemme zrugglueget, au mängmol Graf Rudolf vo Habsburg, aber d Burg, wo dä Name härchunt, isch erscht spoot i sym Läbe bout worde und vermuetlech gar nit für iin.

e Deil vo der Alteburg bi Brugg; die ticki römischi Muur isch gannz rächts und näbedra d Hüüser vo der Burg

Der Rudolf isch us ere bedüütende Familie cho, wo Güeter vom Elsass bis is Gebiet vo der Aare gha het. D Familiegschicht vo de erschte Habsburger isch nid gnau bikant, me nimt aaber aa, der Grossvatter vom Rudolf sig der Guntram gsi, wo der Zuename der Ryych gha het; em Rudolf si Vatter isch der Graf Lanzelin (oder Landolt) gsi, und er het drüü Brüeder gha, der Graf Radbot, wo d «Habsburg» het agfange boue, der Landolt der Zwöit und der Werner. Dää isch Bischof vo Stroossburg worde.

Der Rudolf het d Kunigunde ghürootet, wo d Dochter vom Herzog Kuno vo Bayern gsi isch.

d Chlooschterchile z Otmersche

Der Graf Rudolf het e Grafschaft vom alemannische Gebiet im Herzogtum Schwoobe regiert; me weiss nid, ob das der Briisgau oder der Aargau oder es anders Gebiet gsi isch. Er het uf jede Fall Bezieige i vil Gebiet a der Aare und am Rhy gha. Es chönt sy, ass äär d Burg «Alteburg» het lo boue, wo im röömische Kaschtell i der Nöchi vo Brugg im Aargau gstanden isch. Hüt isch dört im Ortsdeil Alteburg d Jugendherbärg vo Brugg. Und der Rudolf het am Rhy unde s Mariechlooschter vo Otmersche gründet. Der Papscht Leo der Nüünt isch d Chlooschterchile für iin cho yweie, und der Graf Rudolf het me nach sym Tood i dere inn begrabe. Die schöni romanischi Chlooschterchile stoot no hüt.

Literatur ändere

  • Martin Kiem (Ed.): Acta Murensia. in: Quellen zur Schweizer Geschichte III., Basel 1883.

Weblink ändere