Hauptmenü ufmache

GeografyBearbeite

D Aare louft vo der Kwelle im Grimselgebiet i de Alpe dur d Kantöön Bärn, Soledurn und Aargau und mündet bi Choblez in Rhy.

Si het e Lengi vo 291 Kilometer und isch dr längschti Fluss, wo vo dr Kwelle bis zur Mündig ganz i dr Schwiiz isch.

Vo ganz oben i de Bärge bis z’underscht am Rhy het dr Fluss es Gfäll vo 1565 Meter

S Yzugsgebiet het e flechi vo 17'620 Kwadratkilometer.

Dr middlere Abfluss isch bi 590 Kubikmeter Wasser pro Sekunde.

 
d Aareschlucht bi Meiringe

dr Louf vom FlussBearbeite

Im Grimselgebiet foot d Aare am Ober- und am Unteraargletscher aa, wo oben a Guettanne ligge. Churz drufabe chunt dr Fluss dur d Aareschlucht, wo tüüf i d Felse ygschnitten isch, das isch grad oben a Meiringe. Die Schlucht isch en Attrakzioon für d Turischt.

Bi Brienz mündet d Aare i Brienzersee, wo si z Interlake weder drus use goot. Churz nacher mündet d Lütschine i si ine. Drufabe chunt d Aare i Thunersee, wo au d Kander (mit dr Simme und dr Engstlige) driimündet.

Vo Thun a flüsst d Aare dur es breits Tal bis uf Bärn. Bi Belpmoos münde d Gürbe und d Giesse zämme id Aare. I dr Stadt Bärn macht die e Boge um d Altstadt, wo bi Hochwasser öppe mol d Matte ungen am Schwellemätteli chli nass wird. Es bitzeli witer unge het’s drüü Mäander um d Ängihalbinsle, und nocher wird de Fluss im Wohlesee gstaut.

Nach der Iimündig vo dr Saane bi Oltige wird d Aare sit dr Juragwässerkorrekzioon dure Hagneck-Kanal i Bielersee umgleitet. Bi Nidau chunt si us em See use und louft düre Nidau-Büüre-Kanal und churz vor Büüre wider i ihres alte Flussbet zrugg. Di alti Flussschtrecki zwüsched Aarberg und Büüre, di sogenannti "alti Aare", isch e grossi, gschützti Naturlandschaft. D Strecki vo Nidau a abwärts bis uf Soledurn isch dr einzig Abschnidd vo dr Aare, wo mit em Schiff cha befahre werde. I däm Teil vo de Aare isch nach dr Yschzyt de «Solothurner See» gsi, wo den mit dr Zyt wägem Gschieb vo de Flüss verlandet isch; hüt lyt do en grossi Ebeni.

Bi Luterbach mündet d Ämme id Aare.

Dr Fluss isch beliebt für s Wasserfahre, und er chunt a mängem bekannte Pontonierort verby: Aarwange, Murgete, Aarbig, Schönewerd, Aarau und Brugg. Churz nach Brugg nimmt d Aare s Wasser vo de Rüüs und denn vo de Limet uf, drum sait me dr Gegend um Brugg au s "Wasserschloss vo dr Schwiz".

Vo Brugg wäg flüsst d Aare dur en Klus im Jura gäge Norde, si chunt bi Döddige in Stausee vo Chlingnau und mündet gly drufabe zwüsched Felsenau und Choblez, wisawi vo Waldshuet, in Rhy.

Bi dr Mündig isch d Aare mit iirne 590 Kubikmeter Wasser pro Sekunde eigentlech dr gröösser Fluss als dr Rhy, wo durchschnittlech nume 439 Kubikmeter bringt.

BildergalerieBearbeite

LiteraturBearbeite

WeblinkBearbeite

  Commons: Aare – Sammlig vo Multimediadateie

FuessnoteBearbeite