D Tamina, wo früener au der dütsch Name Tamingebach gha het, isch e Fluss im Kanton Sanggalle i der Schwiiz. Si isch 24 Kilometer lang und en Näbefluss vom Rhy. S Taal vo der Tamina liit im Sarganserland.

Uf der Oschtsyte vom Bärg Sardona foot der Bach i der Gmeind Pfäfers bi es baar Kwelle under em Sardonagletscher uf der Höchi vo 2680 Meter aa.

Zerscht flüsst der Bärgbach dur s Calfeisetaal a der Walsersidlig Sankt Martin verby und chunt denn in Gigerwaldsee.[1] Das isch e Stausee mit ere Betonmuur, wo 147 Meter höch isch. Mit däm See sammlet s Chraftwärch vom Sarganserland, wo houptsächlech de Axpo und zumene ganz chlyne Aadeil em Kanton Sanggalle ghört,[2] s Wasser im obere Taminataal und us em Wyssdannetaal.

Z Vättis flüsst vo Süde, also vo der rächte Syte, der Görbsbach, wo vom Kunkelsbass oben abe chunt, i d Tamina. Wyter unden im Taminatal isch der Mapraggsee, en zwöite Stausee vom Chraftwärchsischteem. Bim See händ d Chraftwärch Sarganserland es Maschinehuus, zum us em Wasser vom Gigerwaldsee Strom z mache, wenn im Leitigsnetz vil Strom verbruucht wird, und süsch wider Wasser i dä höch Spiicher ufezpumpe. Und denn louft der Fluss dur ne töifi Schlucht, won er us em Felse grabe het, gäge Norde. Das isch di berüemti Taminaschlucht, wo drin s alte Pfääferserbaad isch und wo me uf emene Felsewääg cha go aluege. Über d Schlucht goot di nöji Taminabrugg, wo im 2017ni eröffnet worde isch. Bim Ändi vo der Taminaschlucht stoot s Dorf Bad Ragaz, und underhalb vo däm mündet d Tamina uf der Höchi vo 496 Meter in Alperhy.

Weblink ändere

  Commons: Tamina – Sammlig vo Multimediadateie

Fuessnoote ändere

  1. Der Stausee Gigerwald uf pfaefers.ch
  2. D Chraftwärch vom Sarganserland uf axpo.com