Sabine Hartmann-Müller

Dialäkt: Undermarkgreflerisch

D Sabine Hartmann-Müller (* 4. Septämber 1962 z Memmenga) isch e dytschi Bolitikeri (CDU) un syt Oktober 2017 Mitglid im Landdag vu Bade-Wirttebärg.

Lääbe

D Hartmann-Müller isch z Memmenga ufgwachse un dert uf d Grundschuel gange. Am Internat St. Maria z Kaufbeire het si dr Realschuelabschluss gmacht un anne 1982 an dr Fachoberschuel z Memmenga d Fachhochschuelryfi. Vu 1982 bis 1987 het si an dr Fachhochschuel Reidlenga Ussewirtschaft studiert un as Diplom-Bedribswirti (FH) abschlosse. Derno het si vu 1988 bis 2011 z Ludisburg, z Rhyfälde, z Löörech un z Käiseraugscht in verschidene Firmene im Personal-, Finanz- un Rächnigswäse/Organisation gschafft. Syter anne 1989 wohnt si z Rhyfälde-Herte.

S Sabine Hartmann-Müller isch ghyrote mit em Richard Müller un het mit ihm zwai Chinder. Si isch remisch-kadolisch.

Bolitik

Syter anne 1993 isch d Hartmann-Müller Mitglid bi dr CDU. Syter 1995 isch si Vorsitzeri vum Ortsverband Herte un syter 1997 Mitglid vum Vorstand vu dr Fraue Union Rhyfälde, e baar Johr au as Vorsitzeri. Derzue isch si 2018/2019 kooptierti Bysitzeri im Vorstand vum CDU-Chraisverband Löörech un syt 1997 stellverdrättendi Vorsitzeri vum CDU-Stadtverband Rhyfälde. Anne 1999 isch si in Ortschaftsrot vu Herte un au in Gmairot vu Rhyfälde gwehlt wore. Syter anne 2012 isch si Ortsvorsteheri vu Herte.

Bi dr Landdagswahle 2006 un 2016 isch si im Wahlchrais Waldshuet Zwaitkandidati fir d CDU gsii. Zum 25. Oktober 2017 isch si fir dr Felix Schreiner in Landdag noogruckt. Im Landdag isch si Mitglid im Uusschuss fir Sozials un Integration un im Uusschuss fir Verchehr. Derzue isch stellverdrättend Mitglid im Uusschuss fir Europa un Internationals, im Uusschuss fir Inners, Digitalisierig un Migration, im Uusschuss fir Umwält, Klima un Energywirtschaft un im Uusschuss fir Wirtschaft, Arbet un Wohnigsböu.

Syt 2017 isch si Mitglid im Oberrhyroot un bi dr Internationale Barlemäntarische Bodesee-Kumferänz.

Sabine Hartmann-Müller

Lääbe

Bolitik

Weblink