Salman Schasar

Dr Salman Schasar (hebräisch ‏זלמן שז"ר‎, au Shneur Zalman Shazar, uf d Wält chuu as Schneiur Salman Rubaschow; * 6. Oktober 1889 z Mir bi Minsk, Russischs Ryych; † 5. Oktober 1974 z Jerusalem) isch en israelische Schurnalischt un Bolitiker gsii. Vu 1963 bis 1973 isch er dr dritt Staatsbresidänt vu Israel gsii. Us syne Initiale SchSR het er speter sy hebräische Name bildet.

dr Salman Schasar (1951)

Leben

Dr Salman Schasar im Gsprech mit em Konrad Adenauer 1966 z Jerusalem

Dr Schasar isch in ere vum Chassidismus bregte Familien ufgwachse. Scho mit achtzehni het er zwee Monet im em russische Gfängnis verbrocht, wel er si fir di zionistisch Organisation Poalei Zion engaschiert het. Är het z Sankt Petersburg, z Stroßburi, z Fryybùrg un ab 1912 z Berlin jidischi Gschicht studiert, sy Inträssi het do vor allem dr Gschicht vu dr Jude z Oschteiropa gulte, aber au dr Bibelkritik. Är isch Mitarbaiter vu dr Zytschrift Der Jude gsii, wu vum Martin Buber uusegee woren isch, dernääbe het er au fir jiddischi Zytige z Russland un in dr Verainigte Staaten gschribe un au fir di Jüdisch Rundschau.

Anne 1924 isch er uf Paleschtina uusgwanderet. Är isch ain vu dr Mitgrinder vu dr Mapai gsii, dr israelische Arbetsbartei, un het as Redakteer fir s Histadrut-Blatt Davar gschribe (1944 as Schefredakteer). Är het au Gedicht, Essay, autobiografischi Roman, Biografien un wisseschaftligi Täxt verfasst. Sy wisseschaftli Hauptwärch isch e Gschicht vu dr Bibelkritik zäme mit em M. Soloweitschik. Anne 1947 isch er Mitglid vu dr Delegation vu dr Jewish Agency bi dr UN-Verhandlige gsii un het mitgwirkt an dr Israelische Unabhängigkaitserklerig.

Dr Schasar isch 1949 Mitglid vu dr erschte Knesset wore, bis 1963 isch er Abgordnete gsii. In dr Johr 1949 un 1950 isch er Erziehigsminischter gsii. Vu 1963 bis 1973 isch er schließli dr dritt Bresidänt vu Israel gsii.

Anne 1966 isch em d Ehredokterwird vu dr Hebräische Universitet Jerusalem verlihe wore, 1968 d Ehredokterwird vu dr Bar-Ilan-Universitet.

Literatur

• Lexikon des Judentums, Bertelsmann-Lexikon-Verlag, Gütersloh 1971, ISBN 3-570-05964-2, Sp. 699

Weblink

 Commons: Salman Schasar – Sammlig vo Multimediadateie

• Dytschi Biografy

Fueßnote

Dä Artikel basiert uff ere fräie Übersetzig vu dere Version vum Artikel „dütsch“ vu de.wikipedia.org. E Liste vu de Autore un Versione isch do z finde.