Alemannische Wikipedia

Sarah Viktoria Frick

Dialäkt: Undermarkgreflerisch

D Sarah Viktoria Frick (* 28. Juli 1982 z Khuur[1]) isch e schwyzerisch-liachtastaanischi Schauspiileri. E Name gmacht het si si dur iri Zämenaarbet mit em dytsche Theaterreschiseer David Bösch. Syter anne 2009 isch si Mitgliid vum Ensemble vum Wiener Burgtheater.[2]

d Sarah Viktoria Frick mit em Nestroy-Theaterbryys (2010)

Biografy ändere

D Frick isch e Doochter vun eme tächnische Zaichner un isch in ere chlaine Ortschaft mit drei eltere Gschwischtrig ufgwagse,[3] wu alli drei in chinschtlerischi Beruef gange sin.[4] D Sarah Viktoria Frick het uurspringli Hebamme welle gee, speeter Muureri.[3] Wu si s Gimnasium im Alter vu 16 Johr abbroche ghaa het, het si druf ai Summer uf ere Rinderalp gschafft.[5] Dur Bsuech vu Laietheateruffierig vu lokaale Verain, wu unter anderem iri Schweschter mitgmacht ghaa het, isch d Frick uf d Schauspiilerei chuu un het si bi Schauspiilschuele z Bärn, z Züri un z Minche bewoorbe. Mit 17 Joor isch si bim Voorsprächge vu dr Minchner Otto-Falckenberg-Schuel bis in d Ändrundi chuu, wu si aber as z jung abgläänt wooren isch. Bal druf isch d Frick an dr Hoochschuel fir Musik un Theater Züri aagnuu woore.[6]

In dr Zyt vu ire Schauspiiluusbildig z Züri het d Frick dr David Bösch chännegleert, wu an dr nämlige Hoochschuel sy Reschystuudium gmacht het. Dr Bösch het si mit verschiidene Kommilitone*ne in syre freie Büchner-Variante Leonce und Lena – a better day bstetzt. Fir di wyybli Hauptroll vu dr Lena het d Frick dr Daarstellerbryys uf em Dräffe vu dytschsproochige Schauspiilstudänt*ne z Graz 2003 gwunne. Im nämlige Joor het si iri Schauspiiluusbildig mit em Diploom abgschlosse[7] un isch mit em Feerderbryy vu dr Theaterhoochschuel vu Züri, em Oprecht-Bryys, uuszaichnet woore.[8] Doodruf het si Gaschtengaschmänt ghaa am Theater am Nöimärt Züri (as Andreja in Familiengeschichte Belgrad vu dr Biljana Srbljanović) un am Stadttheater Bärn, wu si unter anderem d Mitzi in Der Drang vum Franz Xaver Kroetz gsoiilt het, wider unter dr Reschy vum David Bösch.

Anne 2005 isch d Frick em David Bösch as fescht Ensemblemitgliid ans Schauspiil Essen noogange, wu si au uf di friejere Studiekollege*ne un Bösch-Daarsteller*ne Lukas Graser un Nicola Mastroberardino droffen isch. Mit em Reschiseer dailt d Frick no aigene Aagaabe dr glyych Humoor un e ähnligi Fantasy im Spiil mit dr Gschiichte, wu mer wett verzelle.[5] Si isch noodisnoo zue dr Muuse vum Bösch woore, wu si in iiber eme Dutzed Theaterstugg bstetzt het. Dr Frick giltet as improvisazioonsfraidig,[6] ire Spiil as modäärn mit Lyybyysatz.[9] Glyychzytig het si z Essen e Vorlieb fir wiiderspänschtig Figuure bzw. radikaali Ussesyter*ne entwickelt („Die Figuren müssen schon eine kleine Störung haben, damit ich sie richtig gern habe“).[5] Erfolg ghaa het d Frick scho in dr eerschte Inszenierig vum Bösch s z Essen. In syre Versioon vu s Shakespeares Ein Sommernachtstraum (2005) het si dr Puck as drotzige Teenager un Horrorfilm-Fan daargstellt, was ere dr Noowugsdaarstellerbryys vu dr nordrhyy-weschtfäälische Kritiker yybrocht het.[10] Em Bösch sy Versioon vu Liliom vum Ferenc Molnár (2007), wu si d Julie gee het, isch im Johr druf zur beschte Inszenierig z Nordrhyy-Weschtfaale uusgweelt wore.[6] Si het au em Heinrich von Kleist sy Käthchen von Heilbronn (2006) as modäärni Stalkeri interpretiert, d Antigone vum Sophokles (2008) as puberteeri Amoklaiferi.[5]

Anne 2009 isch d Frick as Ensemblemitgliid an s Wiener Burgtheater gwägslet un isch druf vu dr eeschtryychische Daageszytig Die Presse as inträssanteschte Neizuegang vum Intendant Matthias Hartmann gwäärtet woore.[11] Scho ire Yystand mit mit verschiidene Rolle in Adam Geist vu dr Dea Loher (2009), wiider unter dr Reschy vum David Bösch, het ere dr Nestroy-Theaterbryys as beschti Noowugsschauspiileri yybrocht. In dr Spiilzyt 2010/11 het si unter anderem d Titelroll in s Bertolt Brechts Die heilige Johanna der Schlachthöfe (Reschy: Michael Thalheimer) un d Beppi in s Franz Xaver Kroetz’ Stallerhof (Reschy: David Bösch) gspiilt. Di letschtgnännt Roll, vum Standard as „großes Kunststück“[12] globt woore, het ere 2011 dr Nestroy-Theaterbryys as beschti Schauspiileri yybrocht.[13]

2013 un 2014 isch d Sarah Viktoria Frick as Gute Werke in dr „Jedermann“-Inszenierig bi dr Salzburger Feschtspiil uf dr Bihni gstande.

D Sarah Viktoria Frick isch Mueter vun eme Chind, dr David Bösch isch Getti vun em.[13] Parallel zue ire Theateraarbet het si Rolle in dr Schwyzer Filmprodukzioone Lago mio (2005) un Das Geheimnis von Murk (2008) ibernuu.

Uusglääseni Theaterrolle ändere

  • 2009: Adam Geist vu dr Dea Loher (das Mädchen) – Reschy: David Bösch
  • 2009: Eine Familie vum Tracy Letts (Jean Fordham) – Reschy: Alvis Hermanis
  • 2010: Nur Nachts vu dr Sibylle Berg (Geist 1) – Reschy: Niklaus Helbling
  • 2010: Die heilige Johanna der Schlachthöfe vum Bertolt Brecht (Johanna Dark) – Reschy: Michael Thalheimer
  • 2010: Stallerhof vum Franz Xaver Kroetz (Beppi) – Reschy: David Bösch
  • 2011: Der Boxer oder Die zweite Luft des Hans Orsolics vum Franzobel (Puck) – Reschy: Niklaus Helbling
  • 2012: Onkel Wanja vum Anton Tschechow (Sofja Alexandrowna) – Reschy: Matthias Hartmann
  • 2012: räuber.schuldengenital vum Ewald Palmetshofer (Petra) – Reschy: Stephan Kimmig
  • 2013: Der Talisman vum Johann Nestroy (Salome Pockerl) – Reschy: David Bösch
  • 2013: Mutter Courage und ihre Kinder vum Bertolt Brecht (Kattrin) – Reschy: David Bösch
  • 2014: Maria Magdalena vum Friedrich Hebbel (Klara) – Reschy: Michael Thalheimer

Filmografy ändere

  • 2005: Lago Mio (Fäärnsehfilm)
  • 2013: Jedermann (Fäärnsehfilm)
  • 2015: Jack
  • 2017: Mystery oder: Die Rückkehr des Karl Schmidt
  • 2018: Zauberer
  • 2018: 100 Dinge
  • 2019: M – Eine Stadt sucht einen Mörder (Fäärnsehserie)
  • 2020: Tatort: Der letzte Schrey
  • 2021: Ich und die Anderen (Fäärnsehserie)
  • 2021: Kaiserschmarrndrama
  • 2023: Tatort – Uf em Aff

Heerspiil ändere

  • 2014: Thobias Lambrecht/Franziska Müller: Die Napoleon Bonapartefrau – Reschy: Johannes Mayr (Heerspiil – SRF)

Uuszaichnige ändere

  • 2003: Daarstellerbryys bim Schauspiilschueldräffe z Graz (Leonce und Lena – a better day)
  • 2003: Zürcher Oprecht-Bryys fir Jungschauspiiler (gemeinsam mit dr Rula Badeen)
  • 2006: Beschti Noowugsschauspiileri vu Nordrhyy-Weschtfaale in dr Umfroog vu Welt am Sonntag (Ein Sommernachtstraum)
  • 2010: Nestroy-Theaterbryys as beschti Noowugsschauspiileri (Adam Geist)
  • 2011: Nestroy-Theaterbryys as beschti Schauspiileri (Stallerhof)
  • 2021: Josef Gabriel von Rheinberger-Bryys[14]
  • 2022: Dytsche Schauspiilbryys in dr Kategory Starke Ufdritt (Kaiserschmarrndrama)
  • 2022: Nestroy-Theaterbryys as beschti Schauspiileri (Adern)[15]

Weblink ändere

  Commons: Sarah Viktoria Frick – Sammlig vo Multimediadateie

Fueßnote ändere

  1. ↑ Agenturprofil (Memento vom 4. März 2016 im Internet Archive) uf divina.at
  2. ↑ d Sarah Viktoria Frick bim Wiener Burgtheater
  3. ↑ 3,0 3,1 Petsch, Barbara: Hebamme, Maurer – Mimin, Mama. In: Die Presse, 27. Oktoober 2009, S. 27.
  4. ↑ Mottinger, Michaela: "Heilsarmeekostümchen trägt sie keines". In: Kurier, 28. Oktoober 2010, S. 30.
  5. ↑ 5,0 5,1 5,2 5,3 Cerny, Karin: Kleine Störungen. In: profil, 23. Oktoober 2009, Nr. 44/09, S. 105.
  6. ↑ 6,0 6,1 6,2 Schürmann, Martina: Der Widerspenstigen Kennung bi kulturwest.de, 01/2009.
  7. ↑ Preis für Jungschauspieler. In: Neue Luzerner Zeitung, 3. Novämber 2003, S. 13.
  8. ↑ Pro Helvetia und Migros unterstützen Verlage. In: Tages-Anzeiger, 12. Novämber 2033, S. 55.
  9. ↑ Kralicek, Wolfgang: Bühne statt Bank. In: Kultur Spiegel, 27. September 2010, Nr. 10, S. 50.
  10. ↑ Hoffmans, Christiane: Das Wichtigste aus Nordrhein-Westfalen. In: Welt am Sonntag, 27. Augschte 2006, Nr. 35/2006, S. NRW1.
  11. ↑ Mayer, Norbert: Reife Leistung in Teenager-Rollen. In: Die Presse, 1. Jänner 2011, S. 42.
  12. ↑ Pohl, Ronald: Luftsprünge eines Erdgeistes. In: Der Standard, 12. Dezämber 2010, S. 16.
  13. ↑ 13,0 13,1 Nestroy-Preis an Sarah Viktoria Frick bei kurier.at, 14. Novämber 2011.
  14. ↑ Josef Gabriel von Rheinberger-Preis an Sarah Viktoria Frick. In: Gemeinde Vaduz. 27. Oktober 2021, abgruefen am 12. Oktober 2022.
  15. ↑ Nestroy-Preise: "humanistää!" räumte ab. In: VOL.at/APA. 13. November 2022, abgruefen am 13. November 2022.
  Dä Artikel basiert uff ere fräie Übersetzig vu dere Version vum Artikel „Sarah_Viktoria_Frick“ vu de dütsche Wikipedia. E Liste vu de Autore un Versione isch do z finde.
Vun "https://als.wikipedia.org/w/index.php?title=Sarah_Viktoria_Frick&oldid=1046278"