D Basler Mustermäss

47.5651638888897.6012944444444

Dialäkt: Baseldütsch

Logo vo dr Mustermäss Basel

Dr Iigang zur Halle 2

S alte Symbol vo dr Mäss Basel

D Mustermäss Basel (churz «muba») isch e jöhrligi Mäss-Veraastaltig in dr Schwizer Stadt Basel gsi, wo vo 1917 bis 2019 stattgfunde het. In dr Umgangssprooch het mä hüfig au em Mässgländ esoo gsäit, au wenn dört au anderi Mässe as d «muba» stattgfunde häi (z. B. d Baselworld). An dr Glasfassade vo dr Halle 2 hets e groossi Uhr, wo zum Wohrzäiche vo dr Mäss worden isch (e gliichi Uhr befindet sich am Chraftwärk Birsfälde). Sit 2003 stoht am Mässblatz dr Mässdurm, wo mä scho vo witem cha gseh und won esoo zum zwäite Wohrzäiche vo dr Mäss worden isch.

D «muba» het alli drei Stöck vo dr Halle 2 iignoo und dr ersti Stock vo dr Halle 1. Jedes Joor het si über 300'000 Bsuecher aa us dr Schwiz, us Süddütschland und Frankriich aazooge und isch die grössti Publikumsmäss in dr Schwiz gsi.

Uf em Mässgländ stönde rund um e Mässblatz fümf Halle, en Usstelligsflechi vo 132'000 m², e Kongrässzentrum mit 16 Kongräss- und Komferänzrüüm, e Musical Theater mit 1500 Sitzblätz und e Parkhuus mit 1600 Blätz häi.

Allgemäins

As Waremäss het d Mustermäss de Usteller d Möglikäit gee, Nöjis us verschidnige Beriich vom Detailhandel vorzstelle. D «muba» het jedes Joor im Früehlig stattgfunde. Am Eröffnigsdaag häi alli Lüt, won e Blaggedde vo dr Basler Fasnacht kauft häi, gratis iine chönne.

Sehr beliebt isch emol d «Länder»-Abdäilig gsi, wo sich verschidigi Länder us dr ganze Wält häi chönne bresentiere. Uf dr äinte Site si dört dradizionelli, uf dr andere Site aber au innovativi Ware vorgstellt und verchauft worde. Bi jeder Mäss het s e «Gastland» gee, wo dütlig meh Usstelligsflechi überchoo het as die andere. Vo 2000 aa het s die «Länder»-Abdäilig in dere Form aber nüme gee. S «Gastland» isch aber ie wichdige Bestanddäil vo dr muba bliibe. Im Johr 2011 isch Egypte an dr «muba» verdräte gsi.

Am Aafang vo dr 1990er Joor het in dr Mäss Basel d Kompiutermäss Orbit stattgfunde; spööter isch si uf Züri verleit worde.

Gschicht

1916 het dr Basler Regierigsroot beschlosse, z Basel e Mustermäss z organisiere und im Joor druf het die ersti Mustermäss stattgfunde. 1920 isch d Gnosseschaft Schweizer Mustermesse gründet worde und 1926 si die erste definitive Mässehallene uf em hütige Mässgländ eröffnet worde. Noch em Zwäite Wältchrieg isch d Mäss erwiteret worde: 1953 het mä aagfange, die zwäiti Mässhalle baue und 1965 isch d Halle 3 fertig worde. 1973 isch die ersti Uhre- und Schmuckmäss organisiert worde, wo hüte under em Naame Baselworld bekannt isch. 1984 isch s Kongrässzentrum Basel eröffnet worde. 1998/99 isch d Halle 1 nöj baut worde. Denn het d muba sich noch Partner afo umluege und 2001 het si sich mit dr Mäss Züüri zur MCH Messe Schweiz AG zämmegschlosse und 2009 häi si dr Name zu MCH Group AG gänderet.

In iire beste Joor het d Mäss mee as e Million Bsuecher gha, aber si immer weniger worde bis 2018 nume no 123'746 Iidritt zellt worde si. Doorum häi d Veraastalter bekannt gee, ass d Mustermäss vom 8. bis 17. Februar 2019 zum letschte Mol wurd stattfinde. Vo 2020 aa sotte aber anderi Mässe staffinde, wo sterker uf Theme usgrichtet wurde si.

S Rundhoofgeböid

Lueg dr Hauptardikel S Rundhoofgeböid vo dr Schwizerische Mustermäss

D Halle 2, s Rundhoofgeböid, isch 1954 vom Archidekt Hans Hofmann baut worde und zelt hüte zu de dänggmolgschützte Baasler Kulturgüeter, wo nazionali Bedütig häi.

Weblingg

• Website vo dr muba
• Website vo dr MCH Group AG

Dä Artikel basiert uff ere fräie Übersetzig vum Artikel „Mustermesse_Basel“ vu de dütsche Wikipedia. E Liste vu de Autore un Versione isch do z finde.