S Simfoniiorkester Baasel

S Simfoniiorkester Baasel (abkürzt SOB) isch äins vo de eltiste Orkester in dr Schwiz. Es isch e hundertköpfigs Bruefsorkester und spiilt äigeni Konzärträije und Gastkonzärt im In- und Usland. Es spiilt au regelmäässig bi Ballett- und Operebrodukzioone vom Theater Baasel. Dr Schefdirigänt isch sit 2009 dr rönommierti amerikanischi Dirigänt und Pianist Dennis Russell Davies. Vo dr Säson 2016/17 aa wird dr Brit Ivor Bolton dr nöi Schefdirigänt und dr Michał Nesterowicz dr 1. Gastdirigänt.

Dialäkt: Baseldütsch

Gschicht

S Orkester isch im Joor 1876 as Baasler Simfonii-Orkester gründet worde, wo dr Muusigsaal im Stadtcasino Baasel baut worde isch. Dä isch au hüte no d Spiilstatt vom Ansembel. Under de Dirigänte, wo mit em Simfoniiorkester Baasel äng verbunde gsi si oder es immer no si, findet mä Nääme wie Johannes Brahms, Felix Weingartner, Gustav Mahler, Wilhelm Furtwängler, Antal Doráti, Gary Bertini, Walter Weller, Armin Jordan, Horst Stein, Otto Klemperer, Nello Santi, Pierre Boulez und Valery Gergiev. E ganzi Räije vo bedütende Wärk vom 20. Joorhundert – under anderem vom Béla Bartók, Arthur Honegger und Bohuslav Martinů – si vom Simfoniiorkester Baasel urufgfüert worde.

1997 het s Baasler Simfonii-Orkester mit em Radio Simfoniiorkester Baasel fusioniert. S Ansämbel het dr Naame Simfoniiorkester Baasel überkhoo, wo hüt no gültig isch. E witere Mäilestäi in dr Gschicht vom Orkester isch s gsi, won es sich 2012 vo dr langjöörige Veraastaltere AMG (Allgemeine Musikgesellschaft Basel) glööst het und en äigeni Abonnemänt-Räije ufbaut het. Sit e baar Joor isch s SOB vil mee au internazional presänt. So het s zum Bischbil 2010 und 2015 e Turnee z China und z Südkorea gmacht, und im Herbst 2012 het s Orkester zwäi Gastspiil z St. Petersburg und z Moskau gee. Im Früelig 2014 isch s z Ängland gsi und in London, Cambridge, Basingstoke, Coventry und Cardiff ufdräte. Wägen em groosse Erfolg isch s SOB au im Herbst 2015 uf Ängland und uf Irland und het fümf Konzärt z London, Cheltenham, Leeds und Dublin gee.

D Schefdirigänte

Dr aktuelli Schefdirigänt Dennis Russell Davies

D Schefdirigänte vom Simfoniiorkester Baasel:

Mario Venzago (1997–2003)
Marko Letonja (2003–2006)
Dennis Russell Davies (sit 2009)
Ivor Bolton (Schefdirigänt vo 2016 aa)
Michał Nesterowicz (1. Gastdirigänt vo 2016 aa)

D Konzärtmäister vo dr Säson 2015/16 si dr Axel Schacher und dr Soyoung Yoon.

S Repertuar

S Repertuar vom SOB isch bräit: Es goot vo dr Wiener Klassik über d Romantik bis zu Komposizioone vo dr jüngste Modärne. Au nöiji Konzärtforme wärde usbrobiert und Koprodukzioone mit Dschääs-, Rock- oder Techno-Acts realisiert. Under em Dennis Russell Davies isch s Repertuar immer mee usbaut worde. D Schwerpünkt si näbe de Klassiker vo dr Modärne au Wärk vo schwizerische und amerikanische Komponiste. Dr Davies und s Simfoniiorkester Baasel schaffe äng mit dr Paul-Sacher-Stifdig zämme.

Uszäichnige

D Ufnaame "A different Schumann Vol. 1-3" häi im Mai 2004 dr Diapason d’or überkhoo. Non e Diapason d'Or het s für "Felix Weingartner: Sinfonische Werke I" im Septämber 2005 gee. „Le Sacre du Printemps“ isch mit em Supersonic-Briis uszäichnet und für e ICMA Music Award 2015 nominiert worde.

Diskografii

"Millistrade": Musikalisches Singspiel von Marius Felix Lange und Linard Bardill
"Of Madness and Love": Works by Hector Berlioz, inspired by William Shakespeare
Franz Schubert: Sinfonien Nr. 2 & 6
Igor Strawinsky: Le Sacre du Printemps
Philip Glass: Symphony No. 4, "Heroes" from the music of David Bowie and Brian Eno
Philip Glass: Symphony No. 1, "Low"
Arthur Honegger: Sinfonien Nr. 2 & 4 "Deliciae Basiliensis"
Franz Schubert: Sinfonie Nr. 8, "Grosse C-Dur-Sinfonie"
Arthur Honegger: Sinfonien Nr. 3 & 1
Franz Schubert: Sinfonien Nr. 3 & 5
Es ist ein Ros' entsprungen: Romantische Musik zu Weihnachten
Anton Bruckner: Sinfonien Nr. 4 & 7
Felix Weingartner: Sinfonische Werke I
Felix Weingartner: Sinfonische Werke II
Felix Weingartner: Sinfonische Werke III
Felix Weingartner: Sinfonische Werke IV
Felix Weingartner: Sinfonische Werke V
Felix Weingartner: Sinfonische Werke VI
Felix Weingartner: Sinfonische Werke VII
Peter Mieg: Klavierkonzert Nr. 2 und "Mit Nacht und Nacht" (Gesänge für Tenor und Orchester nach Texten von Cyrus Atabay)
Robert Schumann: A Different Schumann Vol. 1
Robert Schumann: A Different Schumann Vol. 2
Robert Schumann: A Different Schumann Vol. 3
Maurice Ravel: Orchesterwerke
Bohuslav Martinů: Klavierkonzerte
Luigi Nono: Verschiedene Werke
Iannis Xenakis: Kraanerg, Ballettmusik für Orchester und vierspuriges Magnetband
Klaus Huber: Schwarzerde
Wladimir Rudolfowitsch Vogel: Verschiedene Werke
Frédéric Chopin: Werke für Klavier und Orchester
Thomas Kessler: Verschiedene Werke
Othmar Schoeck: Penthesilea
Symphonic Brass: Werke bekannter Komponisten vom Barock bis zur Moderne, arrangiert von Jean-François Taillard

Litratuur

Tilman Seebass: 100 Jahre AMG - Die Allgemeine Musikgesellschaft Basel 1876–1976.
Rudolf Häusler: AMG - Allgemeine Musikgesellschaft Basel 1976–2001: Eine Festschrift zum 125-Jahr-Jubiläum.
Dr. Hans Ziegler: Geschichte der Basler Orchester-Gesellschaft 1922–1970. Verlag Krebs AG, Basel.
Sigfried Schibli: Geschichte der Basler Orchester-Gesellschaft 1971–2003. Verlag Krebs AG, Basel 2009.

Weblingg

Dä Artikel basiert uff ere fräie Übersetzig vum Artikel „Sinfonieorchester_Base“ vu de dütsche Wikipedia. E Liste vu de Autore un Versione isch do z finde.