Susanne Hennig-Wellsow
D Susanne Hennig-Wellsow (* 13. Oktober 1977 z Demmin as Susanne Hennig) isch e dytschi Bolitikeri (Linki). Syter anne 2004 isch si Mitgliid vum Diiringer Landdaag un syt 2021 isch si Mitgliid vum Dytsche Bundesdaag. Vu 2013 bis 2021 isch si Landesvoorsitzeri vu dr Linke z Diiringe un vu 2014 bis 2021 au Fraktionsvoorsitzeri im Diiringer Landdaag gsii. Vum Februar 2021 bis zue irem Ruggdritt am 20. April 2022 isch si zäme mit dr Janine Wissler Voorsitzeri vu dr Bundesbartei vu dr Linke gsii.
Familie, Uusbildig un Beruef ändere
Dr Vater vu dr Susanne Hennig het as Laschtwaagefahrer gschafft un het in dr DDR Kriminalischt bi dr Volksbolizei glehrt.[1] Iri Mueter isch in dr DDR Standesbeamti gsii un het ab Mitti 1990er Joor im Inneminischterium gschafft.[2] D Hennig het ire Abitur anne 1996 am Erfurter Sportgymnasium gmacht. Vu 1984 bis 1999 isch si Laischtigsportleri im Yysschnälllauf gsii. Anne 1996 het d Hennig an dr Universiteet Erfurt aafange Pedagoogik studiere un s Studium 2001 as Diploom-Pedagoogi abgschlosse. Derno het si vu 2001 bis 2004 bi dr PDS-Fraktion im Diiringer Landdaag as wisseschaftligi Mitarbaiteri fir Bildig un Meedie gschafft. D Hennig-Wellsow isch ghyroote, het e Chind (* 2014) un läbt z Erfurt.
Bolitik ändere
D Susanne Hennig-Wellsow isch Mitgliid vu dr Bartei Die Linke un isch vu 2007 bis 2012 Mitgliid im Stadtvorstand Erfurt vu dr Bartei gsii. Uf kommunaler Ebeni isch si zwische 2004 un 2012 Mitgliid vum Erfurter Stadtroot gsii. Dert isch si vor allem zueständig gsii fir Jugedbolitik un Jugedferderblanig. Scho syter 2002 isch si Mitgliid im Jugedhilfsuusschuss vu dr Stadt Erfurt gsii.
Mit 26 Johr isch si anne 2004 iber s Jugedticket vu dr PDS als jingschti Abgordneti in Diiriginger Landdaag gwehlt wore. Dert isch si in dr Linksfraktion bis 2012 Sprächeri fir Uusbildigs- un Studäntefrooge gsii. Si isch Mitgliid gsii im Bildigsuusschuus un stellverdrättend Mitgliid im Wisseschafts- un im Wirtschaftsuusschuss. Vu 2012 bis 2014 isch si bildigsbolitischi Sprächeri vu ire Fraktion gsii. Zäme mit irem Fraktionskolleg Matthias Bärwolff het si im Oktober 2004 in dr Erfurter Innestadt s uffig Jugedwahlkraisbiro RedRoXX as Aalaufpunkt fir di links-alternativ Szene im Erfurter Ruum ufgmacht.
Bi der Landdaagswahl 2009 isch si as Diräktkandidati fir dr Wahlkrais Erfurt II in Diiringer Landdaag yyzoge. 2011 isch si zur stellverdrättende Vorsitzeri vu dr Bartei Die Linke Thüringen gwehlt wore. Im Novämber 2013 isch si mit 76 vu 134 Delegiertestimme im eerschte Wahlgang gege zwai Geegekandidate zur neie Diiringer Landesvorsitzeri vu dr Bartei Die Linke gwehlt wore. Bi dr Landdaagswahle 2014 un 2019[3] het si ire Diräktmandat chenne verdaidige. No dr Wahl vum Bodo Ramelow zum Diiringer Minischterbresidänt isch si am 10. Dezämber 2014 zur Vorsitzeri vu dr Linksfraktion im Diiringer Landdaag gwehlt wore. Am 15. Novämber 2015 isch si z Gotha mit 75,4 Brozänt vu dr Stimme as Landesvorsitzeri bstetigt wore.[4]
Am 4. Septämber 2020 het si verchindet, ass si fir dr Bundesvoorsitz wett kandidiere.[5] Uf em 7. Bundesbarteidaag im Februar 2021 isch d Susanne Hennig-Wellsow mit 70,5 % vu dr Stimme zur Bundesvoorsitzeri vu dr Bartei Die Linke gwehlt woore.[6]
Am 20. April 2022 isch si as Barteivoorsitzeri vu dr Linke zruggdrätte.[7][8]
Schrifte ändere
- Wie antwortet DIE LINKE auf die Ausbildungsmisere? In: Horst Bethge, Gerrit Große, Nele Hirsch, Ulrike Zerhau (Hrsg.): PISA-Schock: Was sagt DIE LINKE? VSA-Verlag, Hamburg 2008, ISBN 978-3-89965-290-1.
- Susanne Hennig-Wellsow (Hrsg.): Mit LINKS regieren? Wie Rot-Rot-Grün in Thüringen geht. VSA-Verlag, Hamburg 2015, ISBN 978-3-89965-672-5.
Weblink ändere
Commons: Susanne Hennig-Wellsow – Sammlig vo Multimediadateie- Websyte vu dr Susanne Hennig-Wellsow
- Churzbiografi. Thüringer Landtag.
- Hennig-Wellsow uf dr Syte vu dr Diiringer Landdaagsfraktion Die Linke
- Wahlkraisbiro RedRoXX
Fueßnote ändere
- ↑ Claus Peter Müller: Ausdauernd. In: Frankfurter Allgemeine Zeitung. 21. Novämber 2014, S. 8.
- ↑ Über mich. In: susannehennig.de. Abgruefen am 13. März 2020.
- ↑ Wahlen in Thüringen. Landtagswahl 2019 in Thüringen – endgültiges Ergebnis. In: thueringen.de. Abgruefen am 10. Januar 2020.
- ↑ (dpa/th): Thüringen. Hennig-Wellsow zur Landesvorsitzenden wiedergewählt. In: Die Welt. 15. November 2015, abgruefen am 15. November 2015.
- ↑ Auch Susanne Hennig-Wellsow will Linke-Chefin werden. Die Zeit, 4. Septämber 2020.
- ↑ Janine Wissler und Susanne Hennig-Wellsow sind neue Vorsitzende der Linken, Der Spiegel, 27. Febriuar 2021
- ↑ Hennig-Wellsow tritt als Parteivorsitzende der Linkspartei zurück. In: zeit.de. 20. April 2022, abgruefen am 20. April 2022.
- ↑ Die Linke: Susanne Hennig-Wellsow tritt als Parteichefin zurück. In: Der Spiegel. 20. April 2022, ISSN 2195-1349 (spiegel.de [abgerufen am 20. April 2022]).