Tate Gallery of Modern Art

D Tate Gallery of Modern Art (churz Tate Modern) z London isch s grösste Museum für modärni Kunst uf dr Wält. Es het si Sitz im ene umbaute Chraftwärk, dr früenere Bankside Power Station, am Uufer vo dr Themse im Stadtdäil Southwark.

D Tate Gallery

Gschicht

Im Joor 1916 het d Tate Gallery d Ufgoob bechoo, e Sammlig vo internazionaaler Moolerei und Plastik noch em Joor 1900 zämme z stelle. Wil sich die Sammlig enorm vergröösseret het und au immer beliebter worde isch, isch dr Standort z Millbank schliesslig z chlii worde. 1987 isch e Bransche z Liverpool ufdoo worde und 1993 z St Ives in Cornwall. Sit dr Eröffnig am 11. Mai 2000 residiert d Hauptsammlig in dr ehemoolige Bankside Power Station, wo ursprünglig vom Giles Gilbert Scott entworfe worde isch. S Schwizer Archidekduurbüro Herzog & de Meuron het sich mit sine Blään für en Umbau duuregsetzt. No in Joor 2000 isch d Fuessgängerbrugg Millennium Bridge ufdoo worde, die ersti nöiji Brugg im Härz vo London sit 1894. Si isch e diräkti Verbindig zwüsche dr St Paul’s Cathedral und em Museum. Im Mai 2003 isch dr „tate to Tate“-Bootsservice mit Stopp am London Eye iigrichdet worde.

Entwigglig

Mä het s Museum ursprünglig für 1,8 Millione Bsuecher im Joor blaant, aber im Joor 2012 si s scho 5,3 Millione gsi. Doorum het mä dr Blaan gha, bis 2012, wo die olympische Summerspiil z London häi sölle stattfinde, d Usstelligsflechi um 60 Brozänt z vergröössere. Äine vo de Entwürf vom Archidekduurbüro Herzog & de Meuron isch aagnoo worde, aber immer nonig umgsetzt worde.

D Sammlig

D Durbiinehalle vo dr Tate Modern

D Tate Modern stellt Wärk vo de bedütendste und iiflussriichste Künstler vo dr klassische Modärne und dr Gegewart us. Vo de Wärk vom Vincent van Gogh, Paul Cézanne, Paul Gauguin und Henri de Toulouse-Lautrec aa wärde d Stiilrichdige vo dr Epoche zäigt: Impressionismus, Kubismus, Fauvismus, Futurismus, Expressionismus, Dadaismus, Surrealismus, Pop Art, Minimal Art und Konzeptkunst. S Museum zäigt nit nume Wärk vo de Protagoniste vo dr klassische Modärne u. a. vom Pablo Picasso, Georges Braque, Henri Matisse, Piet Mondrian, Marcel Duchamp, Salvador Dalí und Andy Warhol sondern au awantgardistischi Richdige wie die vom Wiener Akzionismus oder Wärk vom Joseph Beuys und amerikanischi Gegewartskunst (Jackson Pollock, Cy Twombly, Mark Rothko, Ed Ruscha).

D Ustellig

D Duurusstellig isch in vier Beriich iidäilt, nit noch kunstgeschichtlige Epoche sondern noch Themene. Bi dr Eröffnig im Joor 2000 si das Landschaft, Stilllääbe, Historiemoolerei und Akt gsi. Sit dr Nöigstaltig 2006 git s d Beriich States of Flux (Ufbruchstimmig), Idea and Object (Idee und Objekt), Poetry and Dream (Dichdig und Draum) und Matter and Gestures (Materie und Geste). In dr ehemoolige Turbinehalle, wo hüte d Iigangshalle isch, git s groossi Sonderusstellige und groossi Äinzelobjekt.

Weblingg

 Commons: Tate Gallery of Modern Art – Sammlig vo Multimediadateie

• Offizielle Website (englisch)
• Bankside and Battersea Power Station compared. In: CITIES Magazine vom 23. März 2010.

Fuessnoote

Dä Artikel basiert uff ere fräie Übersetzig vum Artikel „Tate_Gallery_of_Modern_Art“ vu de dütsche Wikipedia. E Liste vu de Autore un Versione isch do z finde.

51.507905-0.099352