Titus Quinctius Flamininus

Dr Titus Quinctius Flamininus (* um 230 v. d. Z.; † 174. v. d. Z.) isch e römische Politiker und Fäldherr gsi. Er isch vor allem für si Siig über Makedonie im Zwäite Makedonisch-Römische Chrieg bekannt. Er het zum Gschlächt vo de Quinctii Flaminini ghöört und hette e Brueder ghaa, dr Lucius Quinctius Flamininus, wo öbbe e Joor elter gsi isch.

Karriere

Dr Flamininus het in de letschte Joor vom Zwäite Punische Chrieg in meerere Funkzione as Soldat dient und het noch em Chrieg as Decemvir Veterane aagsiidlet. Öbbe 200/199 v. d. Z. isch er Kwestor gsi und isch scho 198 v. d. Z. zum Konsul gweelt worde, au wenn er die andere Ämter vom cursus honorum nonig usgüebt het und er erst öbbe drissgi gsi isch.

As Konsul het er dr Oberbefääl im Chrieg gegen e Filipp V. vo Makedonie übernoo, und het dä au in de Joor as Prokonsul bhalte. Im Juni 197 v. d. Z. isch em in dr Schlacht vo Kynoskefalai dr entschäidendi Siig über e Filipp glunge. Er het mit em Köönig e Friide abgschlosse, wo Makedonie din versproche het, sich us Griecheland zruggzzie.

Bi de Isthmische Spiil im Früelig 196 v. d. Z. het dr Flamininus d Autonomii vo de griechische Poleis verkündet. Er het vo de Grieche e Hufe Eerige überchoo, u. a. si Bordret uf Goldmünze. Denn isch er no e baar Joor in Griecheland bliibe, zum chliineri Komflikt z schlichte.

194 v. d. Z. isch dr Flamininus noch eme Fäldzug gegen e spartanisch Köönig Nabis mit sine Drubben us Griecheland abzooge und het in Rom e Driumf gfiirt. Im Joor 189 isch er Zensor worde. Denn isch er e baar Joor lang diplomatisch im östlige Middelmeerruum däätig gsi, zum Bischbil as Gsandte zum Köönig Prusias II. vo Bithynie, und het von em verlangt, ass er dr Hannibal wurd usliifere.

Flamininus isch as äine vo de bedütendste römische Filhellene in Erinnerig bliibe, au wenn die römischi Republik in de Joorzäänt druf e sterkeri Machtpolitik Griecheland gegenüber verfolgt het. Dr Kaiser Nero het sich in sinere Freihäitserklärig für d Grieche an de Isthmische Spiil im Joor 67 n. d. Z. uf s Vorbild vom Flamininus bezooge.

Die wichdigste Kwelle für s Lääbe vom Flamininus si die entsprächende Büecher in de Gschichtswärk vom Polybios und vom Titus Livius und im Plutarch si Biografii.

Familiemitgliider mit em gliiche Naame

En andere Titus Quinctius Flamininus, wo si Soon oder Nöwöö gsi isch, isch 150 v. d. Z. Konsul gsi, und däm si Soon, wo gliich ghäisse het, 123 v. d. Z.

Kwelle

Polybios, Historie XVIII.1–12.18–27.33–39.

Litratuur

Linda-Marie Günther: Titus Quinctius Flamininus – Griechenfreund aus Gefühl oder Kalkül? In: Karl-Joachim Hölkeskamp, Elke Stein-Hölkeskamp (Hrsg.): Von Romulus zu Augustus. Große Gestalten der römischen Republik. Beck, Münche 2000, ISBN 3-406-46697-4, S. 120–130.
Rene Pfeilschifter: Titus Quinctius Flamininus. Untersuchungen zur römischen Griechenlandpolitik (= Hypomnemata. Untersuchungen zur Antike und zu ihrem Nachleben. Nr. 162). Vandenhoeck & Ruprecht, Göttinge 2005, ISBN 3-525-25261-7.

Weblingg

Commons: Titus Quinctius Flamininus – Sammlig vo Multimediadateie

Dä Artikel basiert uff ere fräie Übersetzig vum Artikel „Titus_Quinctius_Flamininus“ vu de dütsche Wikipedia. E Liste vu de Autore un Versione isch do z finde.