Drochenasenaffe

Drochennasenaffe

Systematik

Reije:	Landwirbeldier (Tetrapoda)
Chlass:	Süüger (Mammalia)
Underchlass:	Höcheri Süüger (Eutheria)
Überordnig:	Euarchontoglires
Ordnig:	Primate (Primates)
Underordnig:	Drochennasenaffe

Wüsseschaftlige Name

Haplorrhini

Pocock, 1918

Deilordnig

Koboldmaki (Tarsiiformes)
Neuweltaffen (Platyrrhini)
Altweltaffen (Catarrhini)

D Drochennasenaffe (Haplorrhini) si en Underornig vo de Primate. Früehner het mä die Dier (mit Usnahm vo de Koboldmaki) as Ächti Affe (im Gegesatz zu de Halbaffe) bezeichnet, die Underdeilig isch aber veraltet.

Allgemeins

D Drochennasenaffe, wo under anderem au d Mensche drzue ghöre, underscheide sich in ere Reihe vo Merkmol vo de Füechtnasenaffe. Drzue ghöre dr Nasespiegel (Rhinarium), wo bi dere Gruppe drochen isch, was en ehnder schlächtere Gruchssinn mit sich bringt, drzue hai die Dier e Wand us Chnoche zwüsche de Auge- und de Schlööfihöhlene. Bi de Drochennasenaffe si Einzelgeburte d Norm.

Verbreitig

D Drochennasenaffe chömme in tropische und subtropische Gebiet vo Amerika und Afrika (allerdings nit uf Madagaskar) vor, z Gibraltar und in Süd- und Südostasie bis noch Japan ufe. Dr Berberaff (Macaca sylvanus) isch näben em Mensch die einzigi freiläbendi Primatenart in Europa.

Dr Mensch läbt uf alle Kontinänt mit Usnahm vo dr Antarktis.

Systematik

Mä deilt d Drochennasenaffe in drei Deilornige ii:

D Koboldmaki läben in Südostasie. Si si früehner mit de Füechtnasenaffe zu de Halbaffe zsämmegfasst worde, si aber nöcher mit de übrige Drochennasenaffe verwandt.
D Neuwältaffe chömme numme uf em amerikanische Kontinänt vor, vo do chunnt ihri Bezeichnig. Si deile sich in fümf Familie ii: Chrallenaffe (Callitrichidae), Kapuzinerartigi (Cebidae), Nachtaffe (Aotidae), Chlammerschwanzaffe (Atelidae) und Sakiaffe (Pitheciidae).
D Altwältaffe us Eurasie und Afrika deile sich in zwei Überfamilie: die Gschwänzte Altwältaffe (Cercopithecoidea), wo die einzigi rezänti Familie die Meerchatzeverwandte (Cercopthecidae) si, und die Menschenartige (Hominoidea), wo d Gibbon und d Menschenaffe (d Hominini iigschlosse) drzueghöre. Stammesgschichtlig si d Koboldmaki d Schwestergruppe vo de beide andere Deilornige, wo mänggisch au under em Name Eigentligi Affe (Anthropoidea) zsämmegfasst wärde.

S Diagramm unde noche verdütligt d Verwandtschaftsverheltnis:

Drochennasenaffe (Haplorrhini)
  │
  ├──Koboldmaki (Tarsiiformes)
  │
  └──Eigentligi Affe (Anthropoidea oder Simiiformes)
        ├──Neuwältaffe oder Breitnasenaffe (Platyrrhini)
        │     ├──Sakiaffe (Pitheciidae)
        │     └──N.N.
        │        ├──Chlammerschwanzaffe (Atelidae)
        │        └──N.N.
        │           ├──Chrallenaffe (Callitrichidae)
        │           └──N.N.
        │              ├──Nachtaffe (Aotidae)
        │              └──Kapuzinerartigi (Cebidae) 
        │
        └──Altwältaffe oder Schmalnasenaffe (Catarrhini)
              ├──Gschwänzt Altwältaffe (Cercopithecoidea)
              │    └──Meerchatzeverwandti (Cercopithecidae)
              │
              └──Menschenartigi (Hominoidea)
                   ├──Gibbon (Hylobatidae)
                   └──Menschenaffe (Hominidae)

Litratur

Thomas Geissmann: Vergleichende Primatologie. Springer, Berlin 2003, ISBN 3-540-43645-6

Weblingg

Commons: Haplorrhini – Sammlig vo Multimediadateie

Dä Artikel basiert uff ere fräie Übersetzig vu dere Version vum Artikel „Trockennasenaffen“ vu de dütsche Wikipedia. E Liste vu de Autore un Versione isch do z finde.