Ulrich I. vu Wirttebärg

Dialäkt: Undermarkgreflerisch

Dr Ulrich I. vu Wirttebärg, gnännt Ulrich dr Stifter oder Ulrich mit em Duume, (* 1226; † 25. Februar 1265) isch ab uugfehr 1241 Grof vu Wirttebärg.

Sigel vum Ulrich vu 1259

Lääbe

Wie dr Ulrich verwandtschaftlig zue syne Vorgänger stoht, isch historisch nit klar un sicher belait. Dr Hischtoriker Hansmartin Decker-Hauff nännt dr Ulrich e Suhn vum Hermann vu Wirttebärg un vu dr Irmengard vu Ulten . Dr Hermann, wu nume aimol 1231 urkundlig gnännt wird, isch wahrscyns e Suhn vum Hartmann I. gsii. Dr Ulrich 1241 het anne 1241 zämme mit syym Brueder Eberhard vu Wirttebärg regiert, urkundet un gsiglet. Im Johr 1243 wäre beedi Vettere vum Hartmann vu Grienenge gnännt. Dr Ulrich wird 1255 as Verwandte vu dr Vatersyte här vum Grof Albert IV. vu Dillenge gnännt.

Bolitik

D Uussenandersetzig zwisch em Stauferchaiser Friedrich II. un dr Päpscht Gregor IX. un Innozenz IV. het au Uuswirkige uf d Verhältnis im Herzogtum Schwobe ghaa. No dr Absetzig vum Friedrich II. dur s Konzil vu Lyon isch dr päpschtlige Diplomati glunge, ne große Dail vu dr Adlige vum Herzogtum uf d Syte vu dr Gegechenig Heinrich Raspe un Wilhelm vu Holland z zie. Dr Ulrich isch anne 1246 zämme mit eme andere schwebische Adlige zum Heinrich Raspe iberdrätte, was zum Siig vum Heinrich iber s Heer vum Konrad IV., em Suhn vum Friedrich II., byydraage het. Dr Ulrich het d Laag gnutzt go syy Territorialmacht im Herzogtum Schwobe uuszböue. Noch em Dod vum Konrad IV. anne 1254 isch däm sy zwaijehrige Suhn Konradin formäll as Herzog vu Schwobe anerkännt wore. Im Gegezug het em Konradin syy Vormund Herzog Ludwig II. vu Bayern uf d Ruckforderig vu dr Erwärbige vum Ulrich un andere schwebische Adlige noch em Iberdritt vu 1246 verzichtet. Em Ulrich isch s eso glunge, d Grundlag z leege fir d Grofschaft Wirttebärg mit ihre territoriale Schwärpunkt im mittlere Neckarruum, wu vu syne Noofolger wyter uusböue woren isch, in dr Hauptsach vu dr Grofe Ulrich III. un Eberhard III.. D Hochzyt mit dr Mechthild vu Bade het derzue ghulfe, e territoriale Uusglych zwischen baide Hyyser aazstoße mit em Ruckzug vu Bade us em mittlere Neckarruum. Zum Byschpel isch di speter Hauptsadt Stuegert bi dr Hochzyt vu Bade zue Wirttebärg chuu.

Ehe un Chinder

Dr Ulrich isch zwaimol ghyrote gsii.

Us dr erschte Eh mit Mechthild vu Bade sin drei Chinder fiirigange:

• Ulrich II. vu Wirttebärg
• Agnes vu Wirttebärg, ∞ I) Konrad IV. Grof vu Öttingen, ∞ II) Friedrich II. Grof vu Truhendingen, ∞ III) Kraft I. Grof vu Hohenlohe-Weikersheim
• Mechthild (vor 1264 – 24. Juni 1284), ∞ Albrecht, Grof vu Schenkenberg-Löwenstein, Suhn vum Rudolf vu Habsburg, Remisch-dytscher Chenig

Us dr zwoote Eh mit dr Agnes vu Schlesie-Liegnitz het er zai Chinder hinterloo:

• Irmgard (vor 1264 – vor 1278), ∞ Hesso I. Markgraf vu Bade (nume bim Oswald Gabelkover mit uumegligem Stärbedatum 1287 gnännt: dr Hesso isch no 1278 e zait Mol ghyrote gsii)
• Eberhard I. vu Wirttebärg

Dr Ulrich isch, wie syni boode Fraue, im Stift Beitelsbach begrabe. Speter isch er in d Stiftschilche Stuegert iberfiert wore.

Literatur

• Dieter Mertens in: Sönke Lorenz, Dieter Mertens, Volker Press (Hrsg.): Das Haus Württemberg. Ein biographisches Lexikon. Kohlhammer, Stuttgart 1997, ISBN 3-17-013605-4, S. 20

Weblink

 Commons: Grof Ulrich I. – Sammlig vo Multimediadateie

Vorgänger Ludwig III.

Grof vu Wirttebärg 1241–1265

Nochfolger Ulrich II.

Dä Artikel basiert uff ere fräie Übersetzig vu dere Version vum Artikel „Ulrich_I._(Württemberg)“ vu de dütsche Wikipedia. E Liste vu de Autore un Versione isch do z finde.