Ulrich II. vo Klinge

Dr Ulrich II. vo Klinge isch um 1180 im Thurgau uf dr Stammburg vo synere Familie, der Alteburg, geboore und vor em 21. Oktober 1248 gstorbe.

Eer isch dr Soon gsi vom Ulrich I. us em Gschlächt vo de Freiheere vo Klinge. Öppe 1206 het er d Ita vo Tägerfälde, wo um 1184 z Tägerfälde gebooren und am 15. Juni 1255 gstorben isch, ghürootet. Si isch d Tochter gsi vom Walther III. vo Tägerfälde im Surbdaal. Vo sim Schwigervadder het dr Ulrich vil Land im Gebiet a dr undere Aare gerpt. Am 26. Dezämber 1239 het eer mid em Chloschter Sankt Bläsi im Schwarzwald es Stuck Land an dr Aare tuuschet, und ufem Hügel, woner so überchoo het, isch den uf sin Befääl d Stadt Chlingnau bout woorde.

Dr Ulrich und d Ita hend sibe Chind gha:

• dr Walther III. vo Klinge (* vor 1240, † 1. Meerze 1286), Minnesänger, wo d Sophie vo Frohburg, d Tochder vom Hermann III. vo Frohburg und vo der Heilwig vo Habsburg, ghürootet het
• dr Ulrich vo Klinge
• d Willibirg vo Klinge
• d Bertha vo Klinge
• d Ita vo Klinge
• NN
• NN

Me kännt es Bild vom Ulrich vo Klinge, wil im Chlooschter Klingedaal z Basel dr Chopf vo sinere Figuur erhalte pliben isch.