D Vue des Alpes isch e Höchi und e Alpsidlig im Jura und e Bärgpass im Kanton Nöieburg.

d Uussicht vo dr Vue des Alpes im Winter

Über e Bärg goot d Hauptstrooss J20 vo dr Kantonshauptstadt Nöieburg uf La Chaux-de-Fonds. Dr Pass isch uf em Gebiet vo dr Gmeind Val-de-Ruz. Uf dr Südsyte lyt drü Kilometer vor em Pass s Dorf Les Hauts-Geneveys. Grad under dr Passhöchi, wo uf 1283 Meter über Meer isch, lygge d Alpmatte vo Les Loges und vo dr Cernier-Alp. Gäge Norde goot d Strooss sächs Kilometer i grosse Kurve 280 Meter uf La Chaux-de-Fonds abe. Zwe Kilometer südweschtlech vo dr Vue des Alpes goot no e chlyneri Bärgstrooss bi dr Tête de Ran über die Jurachetti.

Vo dr Passhöchi obe het me e schöni Uusssicht ufe middler Deil vom Kanton und wyt über s Middelland zu den Alpe; drum het dr Pass dr Name übercho. Ufem Pass het’s es Hotäll, e Kapälle, e Schliddelbaan und vier grossi Parkplätz.

Ane 1995 isch für die Strooss, wo zimli vil Vercheer drüber goot, es Dunäll underem Bärg gmacht worde, s Vue des Alpes-Dunäll. Es isch technisch i dr Art vo n ere Autostrooss usbout und het e Lengi vo 3250 Meter. Es lyt zwüschem Dorf Les Hauts-Geneveys und dr Stadt La Chaux-de-Fonds. S bsundere dra isch, ass das Dunäll zwe Abschnidd und drzwüsche im änge Daal vo Les Convers e Galery und en Usfahrt het.

Ane 1860 isch d Ysebaanlinie vo dr Baangselschaft Jura Industriel JI vom Nöieburgersee is Daal vo La Chaux-de-Fonds ufgange; die goot au under dr Vue des Alpes dure, und zwar im Dunäll vo Les Loges, wo au zwe Abschnidd het. Im Daalchessel vo Les Convers chunt s Gleis für ne churzi Strechi vo nume öppe hundert Meter usem Bärg; dört isch früener dr Baanhof Les Convers gsi, wo sid 1874 die ursprüngligi Verbindigslinie vo dr Jura-Bernois-Baan JB uf Biel agfange het. Wo d JB s Crosettes-Dunäll diräkt uf La Chaux-de-Fonds usebroche het, isch d Kwerlinie uf Convers scho 1888 stillgleit worde.[1]

Uf dr Passshöchi vo dr Vue des Alpes goot dr Jura-Höhewääg dure.[2]

Weblink ändere

  Commons: Vue des Alpes – Sammlig vo Multimediadateie

Fuessnoote ändere

  1. Le Creux-Les Convers (Memento vom 3. Mai 2018 im Internet Archive) uf eingestellte-bahnen.ch
  2. dr Jura-Höhewäg