Dialäkt: Baseldütsch

Dr Walter Bodmer (1903-1973) isch ä Schwiizer Moler, Bildhauer und Musiker gsi. Är isch ä Pionier vo dr abschdrakte Kunscht in dr Schwiiz gsi.

Läbe ändere

Dr Walter Bodmer isch am 12. August 1903 z Basel uf d Wält cho und het vo 1919 bis 1923 an der Allgemeine Gwärbschuel z Basel än Uusbildig zum Kunschdmoler gmacht. 1927/8 isch er zsämme mit siine Fründ Otto Abt und Walter Kurt Wiemken z Baris und Collioure gsi. Z Collioure hai si sich mit andere Künschdler droffe, wie dr Serge Brignoni oder Jean Matisse. Im Johr 1932 isch dr Bodmer vom Hein Heckroth (1901–1970), ämä dütsche Künschdler, in d Technik vo der Monotypii iigfüehrt worde. Vo do a wird si Kunscht, wo impressionischdisch gsi isch abschdrakter.

Im Februar 1932 het dr Walter Bodmer si erschdi Einzelusschdellig in der Kunschthalle Basel gha.

1933 hai dr Bodmer, siini Fründ dr Walter Kurt Wiemken und dr Otto Abt und anderi die antifaschischtischi Grubbe 33 gründet us Brotescht gege die konservativi Basler Sektion vo der Gesellschaft schweizerischer Maler, Bildhauer und Architekten – GSMBA).

Dr Walter Bodmer het zu dere Ziit agfange sich künstlerisch mit em Kubismus usenanderzsetze. Er het si eignigi Bildschbroch entwicklet, wie mä s in Zeichnige, Relief, Drohtbilder und Skulpture cha gseh. Um 1936 het er sich intensiv mit Metalldroht beschäfftigt. Mit siine Drohtrelief und Drohtskulpture isch er zum enä Pionier vo der abschdrakte Kunscht worde. Im gliiche Johr het er an der avantgardistische Uschdellig „Zeitprobleme in der Schweizer Malerei und Plastik“ im Zürcher Kunschthuus mitgmacht.

Dr Bodmer isch au ä Musiker gsi. Währed de 30er Johr vom 20. Johrhundert het er siis Läbe as Saxophonist und Schlagzüüger in der „Fred Many´s Band“ verdient, wo eini vo de erschte erfolgriiche Schwiizer Jazzbands gsi isch. 1939 isch er Lehrer an der Gwärbeschuel Basel für Aktzeichne, Chopfzeichne und anatomischs Zeichne worde.

Am 30. Dezember 1940 isch si Fründ dr Walter Kurt Wiemken gschdorbe.

1944 het dr Bodmer an der Uschdellig „Konkrete Kunst“ in der Kunschthalle Basel mitgmacht. Näbe siini si Wärk vom Hans Arp, Max Bill, Wassily Kandinsky, Paul Klee, Leo Leuppi, Richard Paul Lohse, Piet Mondrian, Sophie Taeuber-Arp und Georges Vantongerloo usgschdellt worde. 1947 hat er än Uschdellig in der Berner Kunschthalle gha zsämme mit em Leo Leuppi, Alexander Calder und em Fernand Léger.

In de 50er Johr het em Walter Bodmer si Kunscht au internationali Anerkennig übercho: 1956 isch er mit em nationale Kunschtpriis für d Schwiiz vo der Solomon R. Guggenheim Foundation uuszeichnet worde. 1959 het dr Bodmer deilgnoh an der documenta II z Kassel. Im Johr 1968 het er dr Kunschdpriis vo der Schdadt Basel übercho.

Dr Walter Bodmer isch am 3. Juni 1973 mit nünäsächzig z Basel gschdorbe.

Poschdhumi Uschdellige ändere

  • Groossi Retroschbektive: 100. Geburtstag des Basler Künstlers Walter Bodmer – Pionier der Schweizer Abstrakten , Basel 2003

Weblink ändere