Züri 4 und Züri 6
D Züri 4 und Züri 6 si die erste und äinzige Briefmarke, wo dr Schwizer Kanton Züri uusegee het. D Bezäichnig Züri 4 und Züri 6 chunnt vo dr Wärtbezäichnig, wo die Usgoob dominiert.
| Züri 4 und Züri 6 | |
|---|---|
| |
| Usgoob | |
| Land | Kanton Züri |
| Nominalwärt | 4 und 6 Rappe |
| Erstdaag | 1. Merz 1843 |
| Gültig bis | 30. Septämber 1854 |
| Gstaltig | |
| Bildmotiv | Zaalewärt 4 und 6 |
| Farbe | schwarz |
| Entwurf | |
| Stich | |
| Druckart | Stäidruck |
| Perforazioon | Gschnitte |
| Bsunderhäite | ooni Gummierig, roote Linieunderdruck |
| Uflaag | |
| Uflaag | |
D Briefmarke si am 1. Merz 1843 uusechoo. Zu deere Zit het s no käi äihäitligs Bostwääse für die ganzi Schwiz gee. Jede Kanton isch für si äignige Bostdienst verantwortlig gsi. Erst noch em Sonderbundschrieg isch am 1. Januar 1849 s Schwizer Bostwääse gründet worde, wo vo 1850 allgemäini Briefmarke für die ganzi Schwiz uusegee het. Bis denn häi usser Züri nume no d Kantöön Basel-Stadt und Gämf Briefmarke uusegee. Die sältene Briefmarke het mä no bis zum 30. Septämber 1854 döfe bruuche.
D Züri 4 und Züri 6 gälte als die erste Schwizer Briefmarke. Mit em Usgoobdatum vom 1. Merz 1843 weer d Schwiz s zwäite Land uf dr Wält mit äigene Briefmarkeusgoobe nch Groossbritannie. Die Aasicht isch allerdings vor allem usserhalb vo de dütschsproochige Gebiet umstritte, wil es sich bi Züri nit um en äiges Land, sondern um e witgehend suverääne Kanton ghandlet het. Us däm Grund wird d Züri 4 und Züri 6 mänggisch nume as Lokalusgoobe aagluegt und nit as richdigi Briefmarkeusgoob.
Dr Bostwärt isch 4 beziejigswiis 6 Rappe gsi. Die umperforierte Marke si in schwarzer Farb uf wissem Babbiir im Stäidruck in dr Druckerei Orell, Füssli und Co. in Bööge vo 100 Marke häärgstellt worde. Die bäide Freimarke si ganz ooni Gummierig uusechoo und gummiert worde, wemm mä sä brucht het. Näbe dr Ziffere si uf de Marke no d Bezäichnig vom Land und d Inschrift Local-Taxe uf dr Züri 4 und Cantonal-Taxe uf dr Züri 6, wo druf hiiwiise für was die bäide Wärtstuefe dänkt gsi si. D Züri 4 isch also für Brief vo dr Stadtbost und d Züri 6 für Brief innerhalb vom Kanton bis zum ene Gwicht vo äim Lot verwändet worde. Für iigschriibeni Brief het mä 10 Rappe müesse zaale, d. h. e Züri 4 und e Züri 6 uf e Brief chlääbe.
Dr hoochi Sammlerwärt vo dr Züri 4 und dr Züri 6 chunnt drvoo, ass d Marke sälte und seer bekannt si. Für e Spezialist duet sich do e wits Fäld uf. Er cha do zwüsche woogrächte und sänkrächte Underdruck underschäide, fümf verschiideni Tüpe vo jedere Briefmarke sammle und Blattefeeler sueche. D Züri 4 und Züri 6 ghööre näbe dr Dobbelgämf und em Basler Düübli zu de beliebtiste Briefmarke bi Schwizer Filateliste.
Weblingg ändere
|
Dä Artikel basiert uff ere fräie Übersetzig vum Artikel „Zürich_4_und_Zürich_6“ vu de dütsche Wikipedia. E Liste vu de Autore un Versione isch do z finde. |