Anna Reinhart

e Bürgersfrau us Züri

D Anna Reinhart, wo öppen anne 1484 z Züri uf d Wält choo und am 24. Dezämber 1538 au döört gstoorben isch, isch e Züürcher Bürgersfrau gsii. Me kännt si hüt bsunders na, wil si d Frau vom Reformator Zwingli woorden isch.

d Dafele für d Anna Zwingli-Reinhart a de Schiffländi z Züri

Sii isch d Dochter vom Wirt Oswald Reinhart und demm synere Frau Elisabeth gsii. Anne 1504 hät si de Hans Meyer vo Knonau ghüraate, wo im 1517ni gstoorben isch. D Anna hät im Huus zum Hööfli bim Groossmöischter gwoont. D Famlie Knonau hät drüü Chind gha: d Margreet, d Agat un de Gerold.

Im Jaar 1519 hät si de Ueli Zwingli gleert känne, wo sid em Jänner vo demm Jaar z Züri gsi isch, er hät de Poschte vom Lüütprieschter am Groosmöischter gha. Won er wäge der Päscht chrank woorden isch, hät sii en gsund pflägt, und sid 1522 händ si dänn zäme gwoont. Die Zwingli hät em Bischof z Konstanz usse gschribe, me well iin doch usem Zölibaat entlaa, was natürlii nöd so eifach ggangen ischt. Es isch dänn au nümme drufaa choo, wil z Züri de grad d Räformazioon gsii isch.

Ane 1524 händ de Zwingli un d Anna Reinhart ghüraate. Iiri chind sind d Regula, de Wilhälm, de Huldrich un d Anna gsii. wo die alli na chly gsii sind, isch iire Vatter bi de Schlacht z Chappel obe änet em Albis am 11. Oktober 1531 ums Lääbe cho. Au iire eltischt soon us der eerschten Ee, de Gerold, isch deete gstorbe.

D Anna Zwingli hät na es Zytli bim Theoloog und Schriftsteller Heiri Bulinger, em Ueli Zwingli sim Nachfolger als Züürcher Antistes, gläbt, bis si anne 1538 gstoorben isch.

Anne 1999 hät d Züürcher Zouft Gselschaft vom Fraumöischter zum Aadänken a d Anna Reinhart bim Sächsilüüte a die Züürcherin, wo vor föifhundert Jaar gläbt hät, gmaanet und änet de Limet a de Schiffländi en Dafele, wo vo iirem Lääbe verzellt, aagmacht.

LiteraturBearbeite

  • Martin Sallmann: Reinhart, Anna. In: Historisches Lexikon vo dr Schwiiz.
  • Salomon Hess: Anna Reinhard, Gattin und Wittwe von Ulrich Zwingli. Zürich 1820.
  • Gerold Meyer von Knonau: Züge aus dem Leben der Anna Reinhard, Gattin des schweizerischen Reformators Ulrich Zwingli. Erlangen 1835.
  • Susann L. Pflüger: Anna Reinhart. In: Neujahrsblatt der Gesellschaft zu Fraumünster auf das Jahr 2008, Band 2, Zürich 2008, ISBN 978-3-9523176-2-4.

WeblinkBearbeite