Bibermülli

D Bibermülli isch èn Wyyler i dè Gmaand Ramsé im Kanton Schaffuusè i dè Schwyz. Dört git s au s glychnammigi (au als Bibèrèhofguèt bezeichnèti) Landguèt, wo i dè Renaissance wiè-nè Schloss baut worrè isch un a dè Mündig vu dè Biber i dè Hochrhy lyt.

Rhychlingè, Hochrhy un Bibermülli (hinnè)

Gschichtè

Dè 1528 bauti Hof isch als Landguèt mit dè Mülli, wo vomuètlich ältèr isch, anno 1538 vo dè Hèrrè vo Chlingèbärg a d Stadt Staa am Rhy vokauft worrè. 1875 isch es us èm städtischè Bsitz a Brivati vokauft worrè un isch hüt Eigètum vo zwei Familliè.

Historischs Luftbild vum Werner Friedli vu 1954

Ligèschaft

Bibermülli vom Hochrhy uus gsää

Bibermülli 6 un 4

S spôtgotische Haupthuus drait übber m Hauptbortaal d Johreszaal 1529. Dè Bau lyt mit sinèrè Längsachsè barallel zum Hochrhy. S Ärdgschoss un s ärschte Stoggwärch sin us Muèrwärch, woby i dè Eggè chräftigi, zum Deil buckligi Sandschtaiquader ygsetzt sin. S zweiti Obbergschoss bschtòt gröschtèdeils us Fachwärch. Dõ findet sich in èm Zwǜschèfäld zwei Stainer Wappèschild mit èm Rychsadler drübber. Sèlli Mòlerei wörd im 16. Johrhundert zuègschribbè. Diè weschtlichi Sitè hèt èn Stägègybbel, d Oschtsitè vum Satteldach isch lycht abgwalmt.

Nördlich vum Haupthuus stòt ein vo zwei Ställ un Schüèrè, wo 1677 baut worrè sy muè. Sèllè Schluss lòt d Inschrift uff èrè Sandschtaidaflè zuè. Dè öschtlichi Stägègybbel isch nõch èm Brand vo 1920 nit widder uffbaut worrè.

D Mülli stòt weschtlich vum Haupthuus un hèt è Satteldach mit beidsitigèm Stägègybbel.

Südlich vo dè Mülli isch i dè zweitè Hälfti vum 18. Johrhundert è Mansardèhuus aabaut worrè.

Bim Bau vo dè Sulzerschè Villa im Johr 1918, wo dirèkt am Hochrhy lyt, isch s Mansardèhuus stò blibbè, un diè neu bautè Deile vo dè Villa sin stilistisch un formal sèbbèm abber aabasst, asè hèt mò unter andrèm d Dachform nõchgmacht. Sit 1993 bschtòt dõ s Antiquariat Bibermülli, gründèt vum Heribert Tenschert.

Deile vum Ensemble stôn unter Denkmòlschutz.

Literadur

• Reinhard Frauenfelder: Die Kunstdenkmäler des Kanton Schaffhausen. Band 2: Der Bezirk Stein am Rhein (= Die Kunstdenkmäler der Schweiz. Band 39). Birkhüser, Basel 1958, ISBN 978-3-906131-33-7, S. 349–352

Weblinggs

 Commons: Biberhofgut (Ramsen) – Sammlig vo Multimediadateie

47.6796578.804246400

Dä Artikel basiert uff ere fräie Übersetzig vum Artikel „Bibermühle_SH“ vu de dütsche Wikipedia. E Liste vu de Autore un Versione isch do z finde.