D Buurgets

Dä Artikel behandlet d Baasler Patrizierfamilie Buurget. Für Lüt mit em Familienaame Burckhardt lueg doo.

Dialäkt: Baseldütsch

Burckhardt isch dr Familienaame vom e Baasler Patriziergschlächt, wo mä em uf Baaseldytsch Buurget säit.

Gschicht

Dr Stammvater vo dr Baasler Patrizierfamilie isch dr Duech- und Siidehändler Christoph (Stoffel) Burget (1490–1578) us em Münsterdaal im Schwarzwald, wo 1523 Baasler Bürger und 1553 Mitgliid vom Groosse Root worde isch, wo d Familie bis hüte ununterbroche verdräte gsi isch. Dr Christoph Buurget isch en erfolgriiche Duech- und Siidehändler gsi. 1518 in het er d Ottilie Mechler ghürootet und 1539 d Gertrud Brand, d Dochder vom spöötere Bürgermäister Theodor Brand. Us dere Eh het er säggs Söön gha, wo alli usser em Hieronymus, wo Schaffner vom Dütschorde gsi isch, au mit Duech und Siide ghandlet häi, wie dr Vater Mitgliid in zwäi Zümft gsi si und sich mit Döchder us de erste Baasler Familie verhürootet häi. Im 17. und 18. Joorhundert si d Buurgets mit alle Familie vom Daig, de Iseliys, de Meriaas, de Saresys, dr Stäächelys, de Vischers und de Wettstäis verschwöögeret gsi. Vo 1603 aa, wo dr Bernhard Buurget in dr Chläi Root gweelt worde isch, het d Familie bis zur Reform vo 1875 immer e Verdräter in dr Regierig ghaa und dr Isaac Isely het sä wäge iirer politische Macht mit de Medici vergliche. Aber nid nume Politiker und Kauflüt si si gsi, meereri Familiemitgliider si Brofässer an dr Universidäät worde. Äine, dr Johann Ludwig Buurget isch as Forschigsräisende und Entdecker in ganz Öiropa bekannt worde.

S Familiewabbe vo de Buurgets isch gääl mit eme schwarze S und eme schwarze Chrüz druf.

• 
  Dr Christoph Burckhardt (1490–1578)
• 
  D Gertrud Burckhardt geb. Brand (1516–1600), Dochder vom Burgermäister vo Baasel Theodor Brand (1488–1558) und d Frau vom Christoph Burckhardt (1490–1578)
• 
  Dr Theodor Burckhardt (1549–1623), Soon vom Christoph Burckhardt (1490–1578) und dr Gertrud Brand (1516–1600)
• 
  Dr Orientalist Johann Ludwig Burckhardt alias "Scheich Ibrahim"
• 
  Dr Kunsthistoriker Jacob Burckhardt

Bekannti Familiemitgliider

• Gottlieb Burckhardt (1836–1907), e Psychiater
• Jacob Burckhardt (1818–1897), e Kulturhistoriker
• Johann Ludwig Burckhardt (1784–1817), en Oriänträisende, au bekannt under em Psöidonüüm Scheich Ibrahim Ibn Abdallah
• Johann Rudolf Burckhardt (1750–1813), e Siidebandfabrikant und Politiker
• Peter Burckhardt (1742–1817), e Basler Politiker und 1812 Landamma vo der Schwiiz.
• Samuel Burckhardt-Zäslin (1692–1766), e Baasler Undernäämer

Weblingg

• The Burckhardt Family Book 1490-1890 Released shortly after the 400th anniversary of Christoph Burckhardt’s birth in 1890, The Burckhardt Family Book includes 34 plates of portraits of family members from Christoph and Gertrud Burckhardt to a photograph of the 1890 family reunion that took place in Basel on 14 September that year.