Samuel Burckhardt-Zäslin

Dialäkt: Baseldütsch

Dr Samuel Burckhardt-Zäslin (* 16. Septämber 1692 z Baasel, gstorbe 11. Juni 1766 z Basel) isch e Baasler Undernäämer gsi.

Biografii

Dr Samuel Buurged isch as dr Soon vom Christoph Buurged und dr Barbara, geboreni Meriaa uf d Wält cho. Er isch im Joor 1717 in dr Grooss Root gweelt worde, wo noch em Umsturz im Joor 1692 in dr Stadt s Sääge ghaa het. 1735 isch er Rächnigsroot worde. Er isch au Appellazionsherr und Mitgliid vom Land- und Baukollegium gsi. Mit em Salzhandel z Lothringe und bi Bruchsal z Baade isch er riich worde und het as äine vo de riichste Baasler gulte. Er isch Mitbsitzer vo de Schmelz- und Hammerwärk im baadische Wehr gsi und vo de Iisewärk z Huuse.

„Chläi Rieche“ in dr Barockzit, Kupferstich vom Emanuel Büchel, 1752

Z Baasel het er dr Ramsteinerhoof an dr Riddergass 17 im Stiil vom Hoochbarock lo umbaue (1727-32) und het nääbedraa bis an Rhii Gaardeaalaage uf Terrasse aagläit. Au dr Holstäinerhoof an dr Nöie Vorstadt (hüte Hebelstrooss 32) het er renowiert (1752). Z Rieche het er e Landsitz ghaa, dr Böimlihoof und het dä in e Guet im Stiil vom franzöösische Hoochbarock lo umbaue und 1735 non e Lustgaarde aagläit. Die Geböid zele hüte alli zu de dänggmolgschützte Kulturgüeter im Kanton Basel-Stadt. Er isch Bsitzer vo Gmäld vo de flämische, dütsche, franzöösische und italiänische Schuele gsi, was mit deene bassiert isch wäiss mä nit genau.bekannt.

Es isch au dr Buurged gsi, wo 1734 en Idee gha het, was mä mit dr groosse Linde uf dr Pfalz chönn mache. Die isch dört sit 1467 gstande und iire Stamm isch fuul gsi. Dr Buurged het vo dr Baumschuel im Schloss Seehof bi Bambärg gwüsst, wo si die sältene Rosskestene ufzooge häi. Er het s duuregsetzt, ass uf dr Pfalz anstatt vo dr Linde zää Kesteneböim aapflanzt wärde, und die häi de Baasler eso gfalle, ass überall in dr Stadt Kestene aapflanzt worde si.

Dr Samuel Buurged het 1715 d Anna Maria Zäslin ghürootet. Iiri Dochder, d Anna Maria, wo alles gerbt het, het dr Samuel II. Meriaa (1714—1793) ghürootet.

Dr Samuel Buurged isch im Baasler Münster begraabe.

Im Buurged si Erb

• 
  D Kesteneböim uf dr Pfalz hinder em Münster
• 
  Dr Ramstäinerhoof an dr Rittergass 7-9
• 
  Dr Holstäinerhoof an dr Hebelstrooss
• 
  Dr Böimlihoof oder Chläi Rieche

Kwelle

• Marie-Claire Berkemeier-Favre: Burckhardt, Samuel. In: Historisches Lexikon vo dr Schwiiz.