Holstäinerhoof

Dr Holstäinerhoof isch e Barockgeböid an dr Hebelstrooss 32 z Baasel. Er isch dr Sitz vo dr Verwaltig vom Uniwersidäätsspiddaal Baasel.

Dr Holstäinerhoof vo dr Strooss us gse.

Dialäkt: Baseldütsch

Dr Holstäinerhoof vom Gaarde us gse.

Dr Holstäinerhoof stoot uf dr Liste vo de Kulturgüeter z Baasel, wo nazionali Bedütig häi.

Gschicht

Wägen em Pfälzische Erbfolgchrieg, wo 1688 usbroche isch, isch d Frau vom Markgroof Friedrich VII. Magnus vo Baade-Durlach (1647-1709), d Herzogin Augusta Maria vo Schleswig-Holstein-Gottorf (1649-1728), uf Baasel cho woone und het 1696 an dr Nöije Vorstadt, wie d Hebelstrooss denn ghäisse het, Liigeschafte kauft. Uf em Grundstück mit em Naame «Zur Pfalz» het si dr Holstäinerhoof lo baue. Iire Soon, dr Markgroof Karl III. Wilhelm vo Baade-Durlach (1679-1738) het die Liigeschaft 1736 für e Grundstück bi sinere Baasler Residänz, em Markgrääflerhoof, usduscht.

Im Joor 1743 het dr Samuel Burckhardt (1692-1766) dr Holstäinerhoof kauft und het en 1752 in dr barocki Holstäinerhoof lo umbaue, wie men en hüte kennt. S Geböid wird im Johann Jacob Fechter zuegschriibe. Au dr Gaarde stammt us sällere Zit. Wo dr Burckhardt gstorbe isch, het dr Baasler Kaufmaa Albrecht Ochs dr Hoof 1767 kauft. Si Soon Peter het en 1780 gerbt. Dr Peter Ochs isch in d Politik verwigglet gsi, isch Rootschriiber und denn Stadtschriiber worde und het diplomatischi Missione usgfüert. Im revoluzionäre Bariis het er sini Ideä für e gsellschaftligi und politischi Ernöijerig in dr Schwiz afo entwiggle.

Er het de Franzoose sini Vermiddligsdienst abote und in sim Holstäinerhoof häi d Pröisse und d Franzoose 1794 afo über e Friide z verhandle. Dr pröissisch Diplomat Bernhard von der Goltz (1736-1795) het im Hoof gwoont, aber dr Friidensverdraag isch im ene andere Huus underschriibe worde. Wo d Spanier mit de Franzoose häi welle verhandle, het dr Ochs im spanische Diplomat Domingo Gabriel de Iriarte y Nieves Ravelo (1739-1795) e Huus grad näben em Holstäinerhoof vermiddlet, so dass er mit de Franzoose diskreet im Gaarde het chönne verhandle. Im Muusigsaal vom Holstäinerhoof isch denn dr Friidensverdraag zwüsche Schbanie und dr Französische Republik underschriibe worde.

Wo dr pröissisch Gsandti häimgange isch, isch dr franzöösisch Diplomat Marquis François de Barthélemy (1747-1830) im Holstäinerhoof iizooge. Dr Peter Ochs het mit sinere Familie in dere Zit im ene Nääbehuus gwoont. Er het witer Karriere gmacht, isch 1796 Oberzumftmeister z Baasel und 1798 Diräkter vo dr Helvetische Republik worde, aber wirtschaftlig isch s em nid so guet gange. Er het schliesslig dr Holstäinerhoof em Johann Konrad Burckhardt-Ryhiner (1747-1814) müesse verchaufe. S Aawääse het vo denn aa de Buurgeds ghöört, bis es 1871 dr Bandfabrikant Emil Burckhardt-Koechlin kauft het. Däm sini Erbe häi s 1922 em Bürgerspiddaal verchauft. Dr Holstäinerhoof isch dr Sitz vom Bürgerspiddaal gsi, wo denn zum Uniwersidäätsspiddaal worde isch.

Kwelle

• Rudolf Suter: Ckdt. (Basel): Streiflichter auf Geschichte und Persönlichkeiten des Basler Geschlechts Burckhardt, Basler Zeitung, 1990, S. 86ff.
• Georg Kreis, Beat von Wartburg: Basel: Geschichte einer städtischen Gesellschaft, Christoph-Merian-Verlag, 2000 - Basel, S. 152ff.
• http://www.altbasel.ch/haushof/holsteinerhof.html Der Holsteinerhof] uf altbasel.ch, abrüeft am 31. Mai 2014
• D. Huber: Architekturführer Basel: die Baugeschichte der Stadt und ihrer Umgebung, Architekturmuseum in Basel, 1993, S.86
• Jahrbuch der Staatlichen Kunstsammlungen in Baden-Württemberg, 39. Band, Deutscher Kunstverlag, 2002, S. 10

Fuessnoote

47.5610555555567.58155