Clemens XI.

Dr Clemens XI. (* 23. Juli 1649 z Urbino im Chillestaat; † 19. März 1721 z Rom) isch vo 1700 bis 1721 Babst gsi.

Dr Clemens XI.

S Wabbe vom Clemens XI., modärni Noochzäichnig

Lääbe

Er isch as Giovanni Francesco Albani uf d Wält choo, het z Rom alti Sprooche und Rächtswüsseschafte studiert und isch Sekretär vo dr Breve worde. 1690 isch er zum Kardinaldiakon vo dr Ditelchille Santa Maria in Aquiro erhoobe worde. Am 23. Novämber 1700 isch dr Albani zum Babst gweelt worde.

Im spanische Erbfolgchrieg zwüschen Frankriich und Ööstriich isch er uf dr Site vom franzöösische Köönig Ludwig XIV. gsi.

Dr Kaiser Joseph I. het 1706 Parma und Piacenza lo bsetze. 1708 si die Kaiserlige im Chillestaat iigfalle und in Richdig Rom zooge. Dr Clemens XI. het denn am 15. Januar 1709 e Verdraag mit em Kaiser Joseph I. gschlosse und sich din verpflichtet, dr Karl VI., dr Brueder vom Joseph I., as rächtmäässige Köönig vo Spanie zanerkenne und iim s Köönigriich Neapel as Leche z gee.

Dr Clemens XI. uf ere versilberete Bronssemedallie vom Ferdinando Sevo um 1706

Dr Philipp V. het denn dr Kontakt zum Clemens XI. abbroche. 1713/14 isch dr Rastatter Friide abgschlosse worde und dr Philipp het uf die franzöösischi Erbfolg verzichdet und isch Köönig vo Spanie bliibe.

Im Friide vo Utrecht het dr Herzog Viktor Amadeus II. vo Sawoje s Köönigriich Sizilie uberchoo, ooni dr Babst z frooge, wo scho sit mee as 500 Joor dr Lechheer drvo gsi isch. Wo dr Viktor Amadeus au die chirchlige Rächt vom Köönig vo Sizilie beaasprucht het, het dr Clemens XI. s Interdikt über Sizilie verhängt. 1720 het denn Habsburg s Köönigriich gege Sardinie usduscht.

Wo sich dr Kurfürst Friedrich III. vo Brandeburg am 18. Januar 1701 z Köönigsbärg sälber zum „König z Pröisse“ het lo chrööne, het dr Clemens XI. drgege brotestiert, wil Pröisse en ehemooligs Land vom Dütsche Orde gsi isch. Für iin isch dr Friedrich III. immer nume dr Markgroof vo Brandeburg bliibe.

Litratuur

• Friedrich Wilhelm Bautz: CLEMENS XI., Papst. In: Biographisch-Bibliographisches Kirchenlexikon (BBKL). Band 1, Hamm 1975, Sp. 1059–1060.
• James Loughlin: Pope Clement XI (GIOVANNI FRANCESCO ALBANI). In: Catholic Encyclopedia, Band 4, Robert Appleton Company, New York 1908 (änglisch)

Weblingg

 Commons: Clemens XI. – Sammlig vo Multimediadateie

• Druckschrifte vo un iber Clemens XI. im VD 17

Vorgänger Innozenz XII.

Papscht 1700–1721

Nochfolger Innozenz XIII.

Dä Artikel basiert uff ere fräie Übersetzig vum Artikel „Clemens_XI.“ vu de dütsche Wikipedia. E Liste vu de Autore un Versione isch do z finde.