Flugblatz Schmèrlat

Dè Flugblatz Schmèrlat isch è Segelflugblatz uff èm Schmèrlat i dè Chleggaurünni im südliche Kanton Schaffuusè zwüschè m Buèrè- un Wyybaudorf Lööningè un dè Stadt Nüüchilch. Er wörd durch d Segelfluggruppè Schaffuusè (SGS) bedribbè.

Geografii

Dè Flugblatz Schmèrlat lyt wiè in èm Drichter, wo sich gegè Weschtè zum Hochrhy hy öffnè duèt. Am Nordrand vo dè Chleggaurünni ligèd d Sibbè Randè, am Südrand vo dè Rünni, nu oppè 300 m vum Schmèrlat ewäg dè Südrandè.

Dè Schmèrlat sèlber isch è munzigs Büggèle am Südrand vu dè Chläggirunni, wo vomuètlich èmol è ehemòligè Kysbank im Urschtròmdal vum Hochrhy gsi isch. Dè Schmèrlat lyt fascht am linkè Rand vo dè Chläggirünni, durch diè schmal Passagè südlich vum Schmèrlat bassèd nu no d Hauptschtrõss 13 un dè Schaffuuser Abschnitt vo dè Hochrhybaan durrè. Nördlich vum Schmèrlat gòt d Ortsvobindigsschtrõss Lööningè-Nüüchilch voby.

Alleischtelligsmerkmòl vum Flugblatz Schmèrlat sin:

Schmèrlat isch dè einzig Flughaffè im Kanton Schaffuusè.
Schmèrlat isch dè nördlichscht Flugblatz vo dè ganzè Schwiz.

Witerhy gildèt dè Flugblatz uff dè Schmèrlat als dè bescht z erreichende Segelflugblatz i dè Schwiz, allei schu deshalb well er èn rächt grossè Abschtand zum Alpèhauptkamm hèt. Dè högscht Buggel i dè Nöchi isch dè Hoche Randè mit èrè maximaale Höchi vun 930,2 m ü. NHN.