Georg Rheineck
| Dialäkt: Schwäbisch |
Dr Georg Emil Rheineck, wia-nr mit-em volla Nama ghoißa hot (* 24. Mai 1848 z Neckarsulm, † 4. Juli 1916 z Stuegert), ischt a deitscher (wirdabergischer) Bildhauer gwäa.
Aus seim Leaba
ändereDr Georg Rheineck kommt am 24. Mai 1848 z Neckarsulm uff d Welt. Dr Vadder vo deam Bua isch dr prakdische Arzt ond Geburtshelfer Eduard Rheineck, wo’s 1835 aus berufliche Grend vo Ulm en des Städtle vorschlaga hot, wo d Sulm vom Necker uffgnomma wuud. Noch-em Bsuech vo dr Ladein- ond Realschuel hegt dr Georg da Wonsch, späder amol Archidekt zo werra, abr do drmit beißt’r bei seim Vadder uff Granit. So goht’r halt em Alder vo 14 Johr zo de Neckarsulmer Stoimetz-Briader Zartmann en d Lehr ond beendet dui Ausbildong mit-em Gsellabriaf. Ausfilla duet-en des Handwerk abr et. Drom bildet’r sich noch de Feierobed kinschtlerisch weiter en dr Hoffnong, uff dui Weis villeicht irgendwann amol an-ra Kunschtakademii studiira zo kenna.
1970 macht dr Deitsch-Franzeesische Kriag em Georg Rheineck seim Wonsch an krefiga Strich durch d Rechnong: Er wuud als Soldat zor Armee eizoga ond muaß bei dr Belagerong vo Paris sein Denscht vorrichda. Zom Glick kommt’r em Johr druff wiider wohlbehalda hoim. Jetzt bewirbt’r sich om d Uffnahm bei dr Minchner Kunschtakademii. Dui abr lehnt sei Gsuech ab. Meh Glick hot’r bei dr Hochschuel en Stuegert. De sell empfihlt-en noch-ra gewissa Zeit sogar weider an dui renommirda Dreschdner Kunschtaademii. Z Dreschden lernt’r d Emma Roßhirt kenna, ond em Johr 1879 fihrt’r-se zom Traualtar. S Glick vo selle Eheleit währt abr et lang: Scho viir Johr späder stirbt dui Frau bei dr Geburt vo ihrem zwoida Dechderle. Dia Mädla kommet jetzt als Pflegekender zo Vorwande noch Ehrenga ond Pforzheim.
Em Rheineck sei nägschda Stazioo ischt Karlsruah, ond do druff folgt – 1886 bis zo seim Ableaba – Stuegert. En sellra Stadt schließt’r en seira Wohnong en dr Reinsburgstroß 84 am 4. Juli 1916 noch-ma lengera Leida seine Auga fir emmer. 68 Johr alt ischt’r worra. Sei ledschda Ruah fendet dr Georg Rheinbeck uff-em Pragfriidhof. S Grabmal hot der guade Moo selber gschaffa.[1]
A kloina Auswahl vom Georg Rheineck seine Werk
ändere
- Denkmal fir da Eduard Paulus (Luegs Bildle)
- Stehender Jingling mit-ma Fischernetz
- Ja ja tralala[2]
- D Muedergoddes mit-em Jesuskendle ond em St. Joseph
- Skulpdura an dr Eigangsfassade vo dr Stuegerder Kunschtakademii
- A baar Figura firs Landesgewerbemuseom Stuegert[3]
- D Statue vom Georg Wilhelm Friedrich Hegel am Stuegerder Rothaus
- A Grabdenkmal fir da Klaviirfabrikanda Schiedmayer
Quella
ändere- Gerhard Raff: Begnadeter Bildhauer, Artikl en dr Stuegerter Zeidong vom 28. Juni 2016, Ausgab fir da Kreis Beblenga, S. 20
- Lueg d Weblink