Grabhügelnekropole Chripflibuck

D Grabhügelnekropole Chripflibuck isch e Gruppe vo sibe früemittelalterliche Grabhügel. Si lit i de Gmaind Illau-Efreetike im Kantoo Züri.

d Grabhügel vom Chripflibuck

Laag ändere

Die sibe Graabhügel ufem Chripflibuck liget im Studebruneholz öber em Flüssli Chänt zwüschet de Dörfer Graafschtel und Ottike i de Gmaind Ilau-Efreetike im Zörcher Oberland. D Nekropole lit erhööt öber de alte Römerstrooss vo Wintertuur uf Chämpraate am Zörisee. A dere Strooss lit au s Römerkastell Irgehuuse.

Greber ändere

I de 2. Hälfti vom 7. Joorhundert het sich do e richi alemanischi Famili bigrabe loo. Die ältere Greber hend Bigoobe, wie Waffe und Schmuck. Well de Bruuch im uusgende 7. Jh. ufghört het, sind die jüngste drai Greber bigoobeloos. Öber jedem Graab isch en anderthalb Meter höche Hügel uufgschüttet wore. Di uuffälig Grabform zaigt, as die Mane und Fraue, wo sich do bigrabe loo hend, zum lokale alemanische Adel grechnet were chönt. Ahand vo de Datierige hend die sibe Tote zu drai Generatione im uusgende 7. Joorhundert ghöört.

Beata-Landolt-Sippe ändere

I de Joore vo 741 bis 747 het e riichi Famili vom Zürcher Oberland vill Landbsitz em Chlooster Sanggale vermacht, d Schenker sind d Beata und ere Maa, de Landold und spöter de Soo vo ene, de Landbert, wo nochem Tod vo sinene Eltere Mönch woren isch. Die Uurchunde sind zum Tail z Illau und zum Tail z Graafschtel underzaichnet wore. De letzt Ort isch au Grichtsort gsii. Us dem Grund werd vermuetet, as d Beata-Landold-Sippe zu de Nochkome vo de riiche Famili ghört, wo ai bis zwoo Generatione früener i de Grabhügelnekropole bigrabe woren isch.

Weblink ändere

Büecher ändere

  • Helvetia antiqua. Festschrift für Emil Vogt. Züri 1966.
  • Geschichte des Kantons Zürich, Bd. 1. Züri 1995. ISBN 3-85932-1587.