Äptissi Hildegard

D Hildegard (* 828; † 23. Dezember 856 oder 859) isch d Tochter vom Chönig Ludwig vo de Oschtfranke gsii.

Fresko im Fraumöischterchrüüzgang mit de erschte Äptissinne und em Wunder vom Hirsch

Si isch als Tochter vom Ludwig und sinere Frou Hemma, wo d Tochter vomene Graaf gsi isch, ane 828 uf d Wält cho. Ane 844 isch d Hildegard im Alter vo 16 Joor d Äptissi vom Chloschter Möischterschwarzach i de Nöchi vo Würzburg worde. Das isch s Huuschloschter vo de Karolinger gsi.

Wo de Chönig Ludwig ane 853 z Züri es neus Chloschter gründet hät, s Fraumöischter, isch d Hildegard uf Züri cho und di erscht Äptissi vo dem Chloschter a dr Limet worde. Vo de Gründig vom Fraumöischter verzellt e Legände, d Hildegard und iry Schwöschter Bertha siige vo dr Burg Baldere am Albis id Stadt abe ggange zum am Grab vo de häilige Märtürer Felix und Regula uf de Limetinsle go Adacht halte. Underwägs sig ne im Wald a de Siil en Hirsch bigägnet mit emene häll lüchtende Gwäi, und dee heig de beide Fraue zeigt, wo ass i dr Wildnis am Zürisee e nöji Chile sell häregstellt wärde. Wo sii das irem Vatter, em Chönig Ludwig verzellt heige, hät dee gseit, uf dem Platz müess grad es nöis Chloschter baut wärde. Tatsach isch, ass scho zu de Zyte vo de Hildegard s Fraumöischter, won es Chönigschloschter gsii isch, vil Land im Züripiet und wyt drüber use und z Züri au d Grichtsbarkeit übercho hät. Do demit isch d Fraumöischteräptissi d Mäischteri vo Züri worde.

Em Mönch Meginrat, wo id Voralpe id Wildnis ggangen isch zum in ere Äinsidelei z woone, hät si e Figuur vo de Muettergottes mitgee, wird i de Legände verzellt. Da druus isch spöter s Chlooschter Äisidle entstande, wo mit Züri immer e gueti Bezieig gha hät.

D Hildegard isch als Äptissi am 23. Dezämber ane 856 – oder gmäss andere Kwelle ane 859 – gstorbe. Deno isch iry Schwöschter Bertha uf Züri cho und hät als zweiti Vorsteheri s Fraumöischter gläitet.

Lueg au

• Lischte vo de Äptissinne vom Fraumöischter z Züri

Literatur

• Gerhard Hartmann, Karl Schnith (Hrsg.): Die Kaiser. 1200 Jahre Europäische Geschichte. Wiesbaden 2006, ISBN 3-86539-074-9, S. 70.
• Peter Vogelsanger: Zürich und sein Fraumünster. Eine elfhundertjährige Geschichte (853–1956). Züri 1994, ISBN 3-85823-515-6.