Schwamedinge

Schwamedinge isch e Stadtdäil vo Züri im Glattdaal uf der Nordsyte vom Züribèèrg.

am Schwamedingerplatz

Gschicht

Früener isch Schwamedinge en äigeni Gmäind gsi. Im Middelalter hät’s daa nu e ganz e chlyses Doorf gha, es git es Dokumänt im Archyv vom Faumöischter vo ane 915, wo säit, z Schwamedinge siged dazmal nu grad zää Hüüser gsi. 1428 isch s Piet vo Schwamedinge und Umgäbig en Zürcher Obervogtei woorde. Bis 1872 hät s Piet vo Öörlike au na zu Schwamedinge ghöört; erscht dänn isch Öörlike e separati Gmäind woorde.

Ane 1934 hät me d Gmäind Schwamedinge zu de Stadt Züri ygmäindet, und hüt isch daa de Stadtchräis zwölf. D Stadt hät us dem Gebiet drüü Kwardier pildet:

• Schwamedinge Middi
• Saatle
• Hiirzebach

1951 isch die katolisch Chilegmäind vo Schwamedinge gründet woorde; iri Chile hät s Patrozinium vom häilige Gallus. Ane 1975 isch vo Lüüt vo daa d Zouft Schwamedinge gründet woorde, wo amigs au am Sächsilüüte mitmacht. Hütt hät de Stadtdäil öppe driissgtuusig Ywooner.

Schwamedinge isch äine vo de sibe Schuelchräis vo Züri.

s Schuelhuus Löitschebach

s Garderobehuus vo de Sportalaag Heereschürli

Architektur und öfentlechi Aalage im Chräis zwölf

• de Keelhoof Schwamedingen us em 16. Jaarhundert
• d Chile Schwamedinge, au Sankt Niklausechile
• d Stefanschile Hirzebach
• d Chile Saatle
• d Chile Sankt Gallus
• s Schuelhuus Ahorn
• s Schuelhuus Auhof
• s Schuelhuus Auzälg
• s Schuelhuus Fridrichstraass
• s Schuelhuus Herzogemüli
• s Schuelhuus Hirzebach
• s Schuelhuus Löitschebach, wo mit der spektakulèère Turnhalle oben uf em Huus bekant worden isch
• s Schuelhuus Luchswise
• s Schuelhuus Mattehof
• s Schuelhuus Probschtei
• s Schuelhuus Saatle
• s Schuelhuus Stettbach
• der Baanhof Stettbach
• s Güsel- und Häizchraftwèèrch Hageholz
• s Häizchraftwèèrch Aubrugg (es isch im Autobaandrüüegg grad usserhalb vo de Kwartiergränze)

Für d Sportaalag Heereschürli hät d Stadt Züri vom Internazionalen Olümpische Komitee und vo de Internazionale Veräinigung für Sport- und Freizytyrichte en Medalie übercho.

bi de Aubrugg a de Glatt

Vercheer

Dure Stadtchräis Schwamedinge laufe d Kantonsstraasse vo Züri uf Dübedorf, Efreetike und Chloote, d Ysebaan vo Züri uf Winterthur und is Oberland.

S Nüüni- und s Sibnitrams vode VBZ faared zwüsched Milchbuck und em Schwamedingerplatz underirdisch dur de 2.5 km lange Tramtunnel Milchbuck-Schwamendingen.

De Stadtchräis isch vom Autobaanzuebringer A1L mit de Uusfaarte Schwamedingen und Aubrugg ganz verschnitte. D Autobaan isch im Jaar 2023 im Raame vom Projekt Einhausung Schwamendingen überdacht worde. Die groossen Autobaanchrüüzige Züri-Oscht und Waliselle sind grad näbed Schwamedinge.

Literatur

• Martin Illi: Schwamendingen (Gemeinde). In: Historisches Lexikon vo dr Schwiiz.
• Martin Illi: Schwamendingen (Vogtei). In: Historisches Lexikon vo dr Schwiiz.

Weblink

 Commons: Schwamendingen – Sammlig vo Multimediadateie

• Website vom Kwartierveräin Schwamedinge