Karl Burckhardt-Iselin

Dialäkt: Aaglobaaseldütsch

Dr Karl Burckhardt-Iselin (* 2. Juli 1830 z Baasel; † 24. August 1893 z Baasel) isch e Schwizer Politiker gsi.

Dr Karl Buurged-Iseli

Biografii

Dr Karl Burckhardt het Rächtswüsseschafte an de Uniwersidääte Baasel, Göttinge, Berlin, Greifswald, Häidelbärg und Bariis studiert. Z Göttinge isch er Mitgliid im Corps Bremensia gsi. Er het zum Dr. iur. bromowiert und isch denn 1859 Staatskanzlist und Rootschriiber z Baasel worde, 1868 Undersuechigsrichter, 1871 Kriminal- und Bolizeirichter und 1872 Grichtsbresidänt.

Vo 1861 bis 1873 isch dr Burckhardt im Groosse Root vom Kanton Baasel-Stadt gsässe. 1873 isch er dr (letscht) Bürgermäister vo Baasel worde. 1875 isch er Verfassigsroot gsi, noch dr Dotalrewisioon vo dr Kantonsverfassig isch er vo 1875 bis 1893 as Regierigsroot Vorsteher vom Bolizeidepartemänt gsi. Gliichzitig isch er vo 1875 bis Septämber 1889 au Nazionalroot gsi, und 1879/80 Bresidänt vom Nazionalroot. Er isch e Verdrätter vom lingge Freisinn gsi. Vo 1880 bis Mai 1891 isch er au no Resärve am Bundesgricht gsi.

Litratuur

• Carl Manfred Frommel: Die Mitglieder der Bremensia zu Göttingen vom 25. Februar 1811 bis zur Gegenwart. Göttinge 1912, Nr. 572 (S. 135 f.)
• Philipp Sarasin: Burckhardt, Karl. In: Historisches Lexikon vo dr Schwiiz.

Dä Artikel basiert uff ere fräie Übersetzig vum Artikel „Karl_Burckhardt-Iselin“ vu de dütsche Wikipedia. E Liste vu de Autore un Versione isch do z finde.