Katharina von Arx

D Edith Katharina Drilhon-von Arx (* 5. April 1928 z Nidergösge; † 25. Oktoober 2013 z Romainmôtier) isch e Schwyzer Schriftstelleri un Schurnalischti gsii.

d Katharina von Arx anne 1985

Lääbe

D von Arx isch z Nidergösge as Doochter vun eme Filzfabrikant uf d Wält chuu, anne 1933 isch iri Familie mit ere uf Züri zooge, wu si derno ufgwagse isch. Im Joor 1947 het si z Züri d Handelsschuel abgschlosse. Vu 1952 bis 1953 het si z Wien Chunscht studiert, het aber bal e Wältrais aagfange, wu si unter anderem dur Indie, Hongkong, Japan un d USA chuu isch un wu in iirem Buech Nehmt mich bitte mit! Eine Weltreise per Anhalter driiber briichtet het. D von Arx isch ghyroote gsii mit em Schurnalischt un Fotograaf Freddy Drilhon un het mit iim de Doochter ghaa, wu anne 1958 uf d Wält chuu isch. Im Joor 1959 het d Familie s Priorehuus vum Chlooschter Romainmôtier im Waadtland gchauft, wu si in lange Joor reschtauriert hän un wu d von Arx bis zue irem Dood gläbt ghaa het. Dr Nooloss vum Baar isch syter anne 2019 im Archiv zur Geschichte der schweizerischen Frauenbewegung vu dr Gosteli-Stiftig z Worblaufe.

Uuszaichnige

D von Arx het 1975 dr Kultuurbryys vum Kanton Soledurn un 1976 dr Feerderbryys Oute iiberchuu. Derzue het si verschiideni Wäärchbyydreeg vu Stiftige, vum Bund un Kanteen iiberchuu.

Schrifte

• Nehmt mich bitte mit! Eine Weltreise per Anhalter. 1956
• Nichts hat mich die Welt gekostet. Juugedbuech. 1957
• Inselabenteuer. Streifzüge durch die Inselwelt Australiens. Juugedbuech. 1960
• Meine Inselabenteuer. 1961
• Mein Luftschloss auf Erden. Biograafische Romaan. 1975
• Mein Luftschloss auf Erden. Erwytewreti Neiuusgaab. 1981
• Mein Tagebuch zum „Luftschloss auf Erden“" Uusziig. 1982
• Mein Luftschloss in Wolken: Die Fortsetzung von „Mein Luftschloss auf Erden“. . 1988
• Ich bin gern schuld an meinem Glück: Satiren und Geschichten. 1977
• Engel aus der Schreibmaschine. 1979
• Als er noch da war. Roman. 1983

Dokufiktion

• Wilfried Meichtry: Bis ans Ende der Träume. 2018.

Literatur

• Wilfried Meichtry: Die Welt ist verkehrt – nicht wir. Katharina von Arx und Freddy Drilhon. Nagel und Kimche, Zürich, 2015.
• Hannes Vollmuth: Geschichte des Reisens: Liebesnächte auf Tonga. Süddeutsche, 12. Oktober 2015

Weblink

 Commons: Katharina von Arx – Sammlig vo Multimediadateie

Fueßnote

Dä Artikel basiert uff ere fräie Übersetzig vu dere Version vum Artikel „Katharina_von_Arx“ vu de dütsche Wikipedia. E Liste vu de Autore un Versione isch do z finde.