Kurt Müller (FDP)

Dr Kurt Müller (* 16. Merz 1925 z Züri; † 8. Februar 2016; haimatbrächtigt z Löölinge un z Mäile) isch e Schwyzer Bolitiker (FDP) un Schurnalischt gsii.

Kurt Müller

Lääben un Beruef

Dr Kurt Müller isch dr Suhn vum Fabrikant Jakob Müller un däm syre Frau Martha geb. Imhoof gsii. No dr Matura het er an dr Universitet Züri Gschicht un dytschi Literatur studiert. Anne 1950 het er zum Dr. phil. promoviert. Derno het er an dr Universitete Neapel, Paris un Oxford neieri Gschicht un Bolitology studiert. Noch ere churze Zyt Mittelschuellehrer het er anne 1953 e Stell as Inlandredakter bi dr Züri-Zytig (NZZ) aadrätte, 1967 isch er zum Schef vu dr Inlandredakzion bstellt wore. Im Johr 1990 isch er fyyrli verabschidet wore.

Anne 1955 het dr Kurt Müller d Lucie Grat ghyrote.

Bolitik

Dr Kurt Müller isch Mitgliid vu dr Freisinnig-Demokratische Bartei (FDP) wore. Vu 1971 bis 1976 het er d FDP Meilen bresidiert. Uf kantonaler Ebeni isch er 1971 in dr Zürcher Kantonsrot gwehlt wore, wun er im Amtsjohr 1979/80 as Bresidänt vorgstanden isch. Wun er 1984 us em Zürcher Kantonsrot uusgschiden isch, isch er in dr Nazionalrot gwehlt wore. Sy Engaschmänt as Mitgliid vu dr FDP-Frakzion het unter anderem dr ständige Verchehrskummission vu dr Bahn 2000 un dr Jurafrog gulte, är het zum Byschpel e ghaim Dräffe zwisch em Roland Béguelin un em Bundesrot Kurt Furgler z Fäldmäile organisiert. Dr Kurt Müller isch anne 1991 zruggdrätte.

Dr Kurt Müller het derzue vu 1986 bis 1990 di Europäisch Kumferänz fir Mänscherächt un Sälbschtbstimmig bresidiert, vu 1988 bis 2001 d Aktion Begegnung 91, derno ihri Noofolgorganisazion Verein Begegnung 91-2001 un vu 1982 bis 1994 d Arbetsgruppe Chilche un Bolitik vu dr FDP Kanton Züri. Dr Müller het em Vorstand vum Schwyzer Feuilleton-Dienscht (SFD)un dr der Schwyzerische Helsinki-Verainigung aaghert.

Derzue het dr Kurt Müller au Schrifte verfasst zue dr Jurafrog, zum Liberalismus un zue dr Sozialdemokraty.

Publikatione

as Autor

• Bürgermeister Conrad Melchior Hirzel 1793-1843, Dissertation, Hirzel, Zürich, 1952
• Mit em Otto Frei: Die Hintergründe der Jurakrise, Buchverlag Neue Zürcher Zeitung, Zürich, 1965
• Mehr Vertrauen in die Zukunft: Liberalismus als politische Chance, Verlag Neue Zürcher Zeitung, Zürich, 1986

as Rusegeber

• Minderheiten im Konflikt: Fakten, Erfahrungen, Lösungskonzepte, Verlag Neue Zürcher Zeitung, Zürich, 1993

Literatur

• Zürichsee-Zeitung, rechtes Ufer vom 16. März 2005.

Weblink

• Susanne Peter-Kubli: Müller, Kurt. In: Historisches Lexikon vo dr Schwiiz.
• Kurt Müller uf dr Websyte vo dr Bundesversammlig
• Nachlass Dr. phil. Kurt Müller im Archiv für Zeitgeschichte vu dr ETH Züri

Fueßnote

Dä Artikel basiert uff ere fräie Übersetzig vu dere Version vum Artikel „Kurt_Müller_(FDP)“ vu de dütsche Wikipedia. E Liste vu de Autore un Versione isch do z finde.