L’Ami du Patois
L’Ami du Patois isch es Schwiizer Heft, wo für die wälsche Mundarte luegt. Uf Düütsch häisst dä Titel «Dr Mundart-Fründ».
Es chunt sit anne 1973 use, wo’s dr Fryburger Jean Brodard (1017–2006) s eerschte Mol gmacht het zum öppis für die tradizionelli Sproochkultur vom Patois z tue. I dr Zytschrift chöme Sache vo de wälsche Mundartveräin; kantonali Gselschafte vo de Patoisants git’s z Fryburg, im Waadtland, im Wallis und im Kanton Jura. S Heft het dr Undertitel Revue des Patoisants de Suisse romande – oder lenger au: Revue de la Fédération romande et interrégionale des patoisants. Dr Name vo deren überregionaale Tachorganisazioon isch abkürzt FRIP. Dr Romanischt Ernest Schüle het sen anne 1954 als Conseil des patoisants gründet, 1960 het men ere Fédération romande des patoisants gseit, und sit 1991 het si dr aktuell Name.[1]
All Joor git’s drüü Usgabe, eini im April, eini im Septämber und eini im Dezämber. Sit em Joor 2006 isch d Redakzioon im Wallis dihei, im Doorff Savièse, und s Gält zum d Heft mache chunt von ere privaate Stiftig, dr Fondation Bretz-Héritier vo Savièse. Vo de Gründer vo dere Stiftig, dr Anne-Gabrielle und em Nicola Bretz-Héritier isch s Wörterbuech vom Patois vo dären Oortschaft.[2][3]
Im Heft cha me Mundarttegscht, Sache vo Persoone und über Ereignis us dr Patois-Szeene und au Artikel vo Sproochwüssechaftler lääse, öppe vo de Lüüt vom Mundartwörterbuech Glossaire des patois de la Suisse romande. Vo Zyt zu Zyt macht d Redakzioon spezielli Theemeheft, so wie anne 2011 über d Mundartliteratur oder 2014 über d Bedüütig vo de Patois i dr hütige Zyt und 2018 über d Patois-Kultur im Internet. D Artikel sind i de Mundarte vom Frankoprovänzaalisch oder uf Französisch, täils au parallel mit dr Übersetzig i dr andere Sprooch.
Bi dr Redakzioon vom Heft mache mit:
- Gisèle Pannatier, Dialäktoloogin, vo Evolena
- André Lagger, Patoisant vo Ollon
- Anne-Gabrielle Bretz-Héritier, vo Savièse
- Janine Barmaz-Chevrier, Dialäktoloogin, vo Mission im Eifischtal
- Michel Crépin, vo Troistorrents
Weblink
ändere- L'ami du patois: revue des patoisants de Suisse Romande uf patois.ch
- L’Ami du Patois uf dr Websyte vo dr Fondation Bretz-Héritier
Fuessnoote
ändere- ↑ Wendy Ayres-Bennett, Janice Carruthers (Hrsg.): Manual of Romance Sociolonguistics. Berlin Boston 2018.
- ↑ Anne-Gabrielle und em Nicola Bretz-Héritier: Lexique du parler de Savièse, Dichyonéro dou patoue de chavyeje. Savièse 2013.
- ↑ Anne-G et Nicola Bretz-Héritier: Le patois de Savièse. 10 Bänd, 1996-2009.