More than Honey

More than Honey (übersetzt; Meh als Honig) isch en Dokumentarfilm vom Schwizer Reschissör Markus Imhoof, wo im Joor 2012 is Kino cho isch.

Filmdate
Originaltitel	More than Honey
Produktionsland	Flagge von Switzerland Schwiiz Flagge Deutschlands Dütschland Flagge von Austria Öschtriich
Originalsprooch	Dütsch, Schwiizerdütsch, Änglisch, Mandarin
Erschiinigsjoor	2012
Lengi	90 Minute
Altersfreigoob	FSK 7
Stab
Regie	Markus Imhoof
Dräibuech	Markus Imhoof
Produktion	Pierre-Alain Meier, Schwiz Thomas Kufus, Dütschland Helmut Grasser, Öschtriich
Muusig	Peter Scherer
Kamera	Jörg Jeshel
Schnitt	Anne Fabini
Bsetzig
Hauptdarsteller: Biine

Am 11. August 2012 isch de Film am Locarno Film Festival uurufgfüert und am 2. Oktober au am Hamburg Film Festival zaiget worde. Am 25. Oktober isch dänn de Kinostart i de Dütschschwiz und am 28. November 2012 i de Romandii gsi. Z Dütschland wird de Film sit em 8. November 2012 und z Frankriich ab em 20. Februar 2013 zeiget.

De Film isch i de Schwiz zum erfolgriichschte Schwizer Kinofilm vom Joor 2012 und zum erfolgriichschte Schwizer Dokumentarfilm vo allne Zite worde. Die internazionali Kooprodukzion hät näbed em Schwizer Filmpriis au z Dütschland und z Öschtrych di jewils högschti nazionali Uuszaichnig für Dokumentarfilm gwunne.

Inhalt

De Dokumentarfilm „More Than Honey“ goot em wältwite Biinestärbe noche. Er zeiget uf, dass mee als eis Drittel vo üserne Nahrigsmittel ohne s Mitwirke (Bestäübig) vo de Biine nöd wachse würdi. Dä Albert Einstein söll gsait ha; wenn d Biine uusstärbed, stirbt de Mänsch vier Joor spööter au uus.

Im Film gseht me i iidrückliche Noochufnaame s Läbe vo de Biine und eri Organisazion innerhalb vom Biinevolk. Me chan di underschidlichschte Imker bi erer Arbet beobachte und es wird eri Bezüchig zu erne Biinevölker belüchted. So gseht mer zum Bispil en Imker us Twirgi im Nessetal (Gmaind Gadme im Bärner Oberland), Königinnezüchterinne us Mariazell i de Steiermark, verschidnigi Imker i de USA, bis hi zume Biineforschertiim z Australie. I gwüssne Gegende z China sind d Biine bereits uusgstorbe und d Bestäübig vo de Blüete werd i müeseeliger Chliiarbet dor d Mänsche gmacht.

Füüf Joor Arbet hät de Markus Imhoof und sini Lüt i dä Film gsteckt.

Uuszeichnige

• Am 18. Januar 2013 hät de Film More than Honey de «Bayerisch Filmpriis» i de Kategorii «Dokumentarfilm» gwunne.
• Am 31. Januar 2013 isch de Film mit em «PRIX DU PUBLIC» vo de Soleturner Filmtäg uszeichnet worde.
• Am 23. März 2013 gwünnt er de «Schwizer Filmpriis» 2013 i de Kategorie «Dokumentarfilm» und «Filmmusig».
• D Uszaichnig «Romy» 2013 (Film- und Färnseh-Priis vo Öschtriich) i de Kategorie «Beste Dokumentation Kino» und «Bester Produzent Kino-Domumentation» hät de Film Mitti April 2013 übercho.
• Ebefalls gwünnt More than Honey de «Dütschi Filmpriis» 2013, als beschte Dokumentarfilm (26. April 2013).
• De «Prix Walo» 2012 i de Sparte «Filmproduktion» isch em Film am 12. Mai 2013 vergee worde.
• De Film isch vo de Schwiz us för en Oskar im Johr 2014 i de Spartene «beschte ussländische Film» und «beschte Dokumentarfilm» is Ränne gschickt worde.
• Zürcher Filmpriis 2012 als «Bester Dokumentarfilm»
• Öschtriichische Filmpriis för «Beste Tongestaltung»
• Gilde-Filmpriis «Bester Dokumentarfilm» a de Filmkunstmäss z Leipzig
• Dütsche Naturfilmpriis und Publikumspriis am Darsser Naturfilmfestival
• Bester Dokumentarfilm am Santa Barbara International Film Festival
• Best Feature Award am Green Film Festival z San Francisco

und no en Huufe Filmpriis und Uuszaichnige i de verschidnigschte Länder.

Literatur

• Markus Imhoof, Claus-Peter Lieckfeld: More than Honey: Vom Leben und Überleben der Bienen. Verlag orange-press, Freiburg 2013. ISBN 978-3-936086-67-6

Weblink

• More than Honey in dr Internet Movie Database
• More than Honey Offizielli Website vom Film