Perieres

De Perieres (altgriech. Περιήρης) isch i de griechische Mythologi e König vo Messenie.

De Perieres isch de Soo vom Aiolos und vo de Enarete. Sini Frau isch d Gorgophone, e Töchter vom Perseus. Sini Söö sind de Aphareus, de Leukippos, de Boros und de Pisos. Nochem Tood vom Perieres hett d Gorgophone de Oibalos ghüroote, de König vo Sparta. Mengisch werd de Perieres genealogisch is spartanische Königshuus iibaut, deno isch er de Soo vom Kynortas und de Vatter vom Oibalos und Tyndareos.

De Perieres isch König vo Messenie gsii und sini Königstadt isch Andania gsii. Zom Perieres isch de Bogeschütz Melaneus choo, e Soo vom Apollon und de hett vom Perieres s Land um de Karnasischi Hain öberchoo und de Landstrich noch sinnere Frau Oichalia binamst.

Quelle

• Apollodor: Bibliotheke 1.50; 1.87; 2.49; 3.117; 3.123.
• Hesiod: Eoie, 10.27.
• Pausanias: Raise z Griecheland 2.21.7; 3.1.7; 3.11.11; 3.26.4; 4.2.2; 4.2.4; 4.3.7; 5.17.9; 6.22.2.

Literatuur

• Susanne Eiben: Perieres. In: Der Neue Pauly (DNP). Band 9, Metzler, Stuttgart 2000, ISBN 3-476-01479-7, Sp. 567.
• Edward Tripp: Reclams Lexikon der Antike Philipp Reclam jun. Stuttgart (1991), 5. Uuflaag. Lemma: Perieres, S. 421.