Andania (altgriechἈνδανία) isch i de griechische Mythologi di ersti Königstadt vo Messenie gsii. Si isch o för di historischi Zitt bizügt, isch aber no i de Antiki verloo woore. Si werd bim hüttige Dorf Konstantini (noigriech. Κωνσταντίνοι) vermuetet. Andania werd hüüffig as Ort vo de Mysterie gnennt, wo im Karnasischen Hain abghalte wore sind.

Laag ändere

D Laag vo Andania cha nöd aidüttig bistimmt were. Nochem Livius (36.31.7) isch Andania e chliini Stadt (parvum oppidum) zwösched de Stadt Messene und em arkadische Megalopolis, wo sich ane 191 v. Chr. de T. Quinctius Flamininus und de achäischi Feldherr Diophanes troffe hend.

Am gnoiste sind d Aagoobe bim Pausanias, wo im zweete Joorhundert n. Chr. do vorbii choo isch und numeno Ruine gfunde hett. Denoo isch Andania acht Stadie linggs vom Karnasische Hain glege, a de Strooss vo Messene uf Megalopolis. Do de Hain ganz sicher bi de Quelle Divari bim Dorf Polichni glegen isch, büütet sich för Andania s Dorf Konstantini aa, wo ufemene Hügel glegen sich und anderthalb Kilomeeter nordwestlich vo Polichni litt, wa a de Entfernig vo acht Stadie entsprecht. Z Konstantini sind d Reste vonere antike Stadtmuur gfunde wore, wo i die klassischi und hellenistischi Zitt datiert were chönnt. Früenner isch Andania vo de Forschig bi Hellenikó gsuecht wore.

D Aagoobe bim Strabon sind zimmli uugnau. Er schribt, as Andania z Arkadie ligi und de jüngeri Name vo Oichalia vom Eurytos sai.

Gschicht ändere

Mythischi Gschicht ändere

Nochem Pausanias isch Andania vom Polykaon und vo de Messene gründet wore und d Königstadt gsii, bis de Aphareus d Königstadt uf Arene verlait hett. Eng verbunde mit de mythische Gschicht vo Andania isch die vom Karnasische Hain, wo nochem Pausanias mitem messenische Oichalia gliichgsetzt were mue.

Historischi Gschicht ändere

Im Zweete Messenischen Kriege isch Andania e Zentrum vom messenische Widerstand gege Sparta gsii und vo do söll de saagehafti messenischi Held Aristomenes und anderi Widerstandschämpfer herchoo. Wo die sich uf d Bergfesti Eira (Hira) zruggzoge hend, söll Andania uufgee wore sii. Noch de Bifraijig vo Messenie ane 370 v. Chr. hebdi d Messenier nöd wöle, as Andania wider uufbaut weri.[1]

217 v. Chr. hett de spartanischi König Lykurgos Andania erfolgloos aaggriffe, und 191 v. Chr. hend sich z Andania de T. Q. Flamininus und Diophanes troffe. De Pausanias, wo im 2. Jahrhundert de Oort ufgsuecht hett, hett numeno Ruine gsie.

Quelle ändere

Literatur ändere

  • Gerd Sachs: Die Siedlungsgeschichte der Messenier. Hamburg 2006. ISBN 3-8300-2396-0.
  • Yves Lafond: Andania. In: Der Neue Pauly (DNP). Band 1, Metzler, Stuttgart 1996, ISBN 3-476-01471-1, Sp. 681–682 (behandelt vor allem die Mysterien).

Fuessnote ändere

  1. Pausanias 4.26.6