Rhydelta
S Rhydelta vom Bodesee isch das Gebiet, wo der Rhy am oberen Ändi vom See mit häregschwemmtem Material ufgschüddet het.
Geografii ändere
Der Alperhy isch nach der Yschzyt vil wyter obe n i See ggange und het i de Joortusete mit Gschieb und Sand s ganze Rhytaal bis dört hi, wo jetz d Stadt Breagaz isch, ufgfüllt. Wyter oben isch d Ebeni zum grosse Deil i Kulturland verwandlet worde. Der underst und jüngst Abschnitt mid em aktuelle Delta vom Rhy het no vil Uferwald und füechti Aue-Landschafte. S meischte vo däm Gebiet liit z Östriich im Bundesland Vorarlbärg, en chlyne Deil im Weschte isch im Kanton Sanggalle.
Zwo Halbinsle loufe zimlech wyt in See use, der Rhyspitz im Weste und der Rohrspitz östlech dervo. Bim Delta vom Alperhy chöme näbezue no zwei anderi Flüss, d Dornbirner Ach und d Bregenzer Ach, zum Bodesee.
Der Alperhy isch im früene 20. Joorhundert bi der Regulierig vom Rhy ines neus Flussbett, wo e grosse glychmässige Kanaal isch, verleit worde. Um 1960 het s Land Vorarlbärg dernäbe der starch Polderdamm ufgschüttet, zum s Land hindedra für d Landwirtschaft z schütze und s Grundwasser abzsänke, und es het wyteri Auewälder lo umhaue.
S Delta vom Rhy isch s gröschte Schutzpiet mit füechtem Bode am ganze Bodesee. Es het öpe 2000 Hektaare nassi Matte, Schilfflechene, seichts Wasser und Auewälder. Do läbe ganz vil Vogelarte, me het dervo meh als 300 zellt. Es git uf beide Syte vo dr Landesgränze, i der Schwiiz und au im Vorarlbärgische, je es Naturschutzpiet. D Schutzpiet vo Vorarlbärg zelle sid 2003 zu de spezielle Natura 2000-Flechine und sid 1982 zu de Schutzareaal gmäss der Ramsar-Konvänzioon.
S Vorarlbärger Naturschutzpiet Rhynau ändere
Wo i der Nöchi vom Rhy immer meh Gwärbbetriib und Fabrigge bout worde sind, bsunders die im Induschtriizäntrum Höchst, d Dornier-Fabrigg und der Flugplatz Alterhy, isch vom Forschtmeistr Friedrich Lürzer vo Breagaz d Idee cho, s Gländ zwüsche de beide Rhyarme z schütze, wil si für d Landschaft und für d Dierwält so wichtig sige. Ane 1942 het der dozmolig Riichsgau Tirol und Vorarlbärg s Rhydelta und s Rhyholz under Naturschutz gstellt; das isch s erschte Naturschutzpiet vom Vorarlbärg gsi. Ane 1949 het s Land Vorarlbärg de Schutz vom Areal bestätiget und ane 1976 en Vorschrift für sini Pfläg pschlosse.
S Sanggaller Naturschutzpiet Alterhy ändere
Bim Dorf Alterhii im Kanton Sanggalle liit bis zu der Mündig vom Rhy in Bodessee s Naturschutzpiet Alterhy. Wo me det dure d Schwiizer Autobaan A 1 bout het, isch däm sini Flechi zimli verchlyneret worde.
Literatur ändere
- Maria Aschauer, Markus Grabher, Ingrid Loacker. Geschichte des Naturschutzes in Vorarlberg. Eine Betrachtung aus ökologischer Sicht. 2007
- Josef Zoller: Das Naturschutzgebiet Altenrhein im schweizerischen Rheindelta, in: Schriften des Vereins für Geschichte des Bodensees und seiner Umgebung, 2008, Syte 231–248
Weblink ändere
Commons: Rhydelta – Sammlig vo MultimediadateieKoordinate: 47° 29′ 0″ N, 9° 38′ 0″ O; CH1903: 765397 / 261487