Rudolf II. (Burgund)

Dr Ruedolf dr Zwöit (* um 880; † 12. Juli oder 13. Juli 937) isch dr König vo Hochburgund, spöter au vo Niderburgund und e Zyt lang au no König vo Italie gsi.

s Königrych Hochburgund (grüen), s Königrych Niderburgund (orangsch) und s Herzogtum Burgund (bruun) im 9. und 10. Joorhundert

Er isch as eltischte Soon vom König Ruedolf em Erschte vo Hochburgund uf d Wält cho. Sini Mueter isch d Willa, Dochter vom König Boso vo Niderburgund, gsi.

Für d Gschicht vom alemannische Gebiet isch es wichtig, ass dr Ruedolf dr Zwöit probiert het, sis Land gäge Nordoschte ufs Gebiet vom Herzogtum Schwoobe z vergrössere. Das isch am Afang zimli eifach gsi, wil s bi de Alemanne und de Schwoobe dozmol zu schwäre innere Machtkämpf cho isch und s Herzogtum trum schwach und ungschützt gsi isch. De Burgunder isch es glunge, im Middelland Gebiet bis über s Ämmetaal use und im Jura bis uf Basel z erobere. Au Züri isch für churzi Zyt burgundisch worde, bis denn ane 919 d Alemanne und Schwoobe under am Herzog Burchard d Burgunder i dr Schlacht vo Wintertuur gschlage händ. So sind dr Thurgau und dr Zürigau alemannisch blibe.

Es baar Joor spöter – öppe anne 922 – het dr König Ruedolf em Herzog Burchard und dr Herzogin Regelinda iri Dochter Berta ghürootet, wo jetz Königin vo Burgund gsi isch. Me verzellt vo ire no hüt i vilne Saage vo dr Weschtschwiiz.

921 isch dr Ruedolf zum König vo Italie gwäält worde. Wo e Deil vo de Oberiteliäner gägen iin en Uufstand azettlet het, isch em dr Herzog Burchard mit sim alemannische Uufgeboot über d Alpe z Hilf cho. Uf däm Chriegszug anne 926 isch dr Herzog vo de Iteliäner bi Novara agriffen und umprocht worde.

Drufabe het dr Burgunderkönig Italie verloo. Er het aber d Rychssymbol vo de iteliänische Könige mitgnoo. S wärtvollschte drvo isch die Heilegi Lanze gsi. Er het se no ane 926 em düütsche König Heinrich gschänkt, wo drfür Basel definitiv an Burgund überggä het. Sider ghört dä Speer zu de choschtbare Rychsinsignie vo de düütsche Herrscher. Hüt isch er i dr Schatzchammere vo dr Hofburg z Wien.

Anne 933 isch dr Ruedolf mit em König Hugo vo dr Provence überichoo, ass dää sell König vo Italie wärde und dr Ruedolf drfür au s Königrych Niderburgund überchöm. Sider isch s burgundische Rych vo Basel bis as Middelmeer ggange.

Wo dr König Ruedolf gstorben isch, het me ne im königliche Chlooschter Sankt Moritz im Wallis begrabe.

Literatur

• Rudolf Schieffer: Rudolfinger. In: Neue Deutsche Biographie (NDB). Band 22, Duncker & Humblot, Berlin 2005, ISBN 3-428-11203-2, S. 198–200.