Schlacht vo Wintertuur

D Schlacht vo Wintertuur isch es wichtigs politischs Ereignis im Gebiet vo Schwoobe ane 919 gsi.

D Gränze zwüsche Alemannie und em Herzogtum Schwoobe (gääl) und Hochburgund (grüen) im 10. Joorhundert

Dr König Ruedolf dr Zwöit vo Hochburgund het us em Gebiet vo dr Aare sis Rych welle bis an Bodesee vergrössere. Dozmol isch s Herzogtum Schwoobe, wo au die hütigi Oschtschwiiz drzue ghört het, wäge vilerlei Stryt schlächt gfüert gsi, und so het dr Burgunder dänkt, das sig jetz d Glägeheit zum sini Macht z erwytere. Dr Ort Züri, s wichtige Zäntrum vom Zürigöi, het er scho eroberet gha. Won er mit der burgundische Armee drno ane 919 gäge s Tuurgi zogen isch, het sech iim s Ufgebott vom alemannisch-schwööbische Herzog Burchard em Zwöite bi dr alte römische Sidlig Vitudurum, also dört wo hütt d Stadt Wintertuur isch, in Wääg gstellt.

Em Herzog Burchard sini Lüüt händ d Schlacht gwunne. Und so het sech Burgund müesse zruggzie, und au s Zürigöi isch alemannisch blibe und nit zu Burgund cho.

Drufabe hetme d Gränze zwüsche Alemannie und Burgund im schwiizerische Middelland zmitzt dur s Aargäu, öppe vom Vierwaldstettersee bis uf Basel, zoge.