Dr Sarnerbund vo 1832 isch e Bund vo de konservative Schwiizer Kantön Uri, Schwyz (ohni Usserschwyz), Obwalde, Nidwalde, Neueburg und Basel gsi, wo si mit em d Regenerationsbesträbige vo de Liberale hai welle bekämpfe.

d Schwiiz 1814–1847, dr Kanton Usserschwyz isch as Äusseres Land iizeichnet

Dr Sarnerbund isch noch gheime Verhandlige am 15. Novämber 1832 gründet worde. Er isch as Gegebündnis zum liberale Siibnerkonkordat z gseh, wo im Merz vo däm Johr abgschlosse worden isch. Im Bund siini Mitgliider hai sich zerst emol bsundrigs drfür iigsetzt, ass dr Kanton Basel nit in zwei Halbkantön ufdeilt und ass d Deilig vom Kanton Schwyz rückgängig gmacht wurd.

Wo dr neu Halbkanton Basel-Land in d Dagsatzig iiglade worden isch, hai d Kantön vom Sarnerbund us Protest zweimol z Schwyz e Gegedagsatzig duuregfüehrt. Dr Versuech, die neuentstandene Kantonshauptstedt am 1. August in Usserschwyz und am 2. August im Baselbiet z bsetze, het zun ere Intervention vo dr Dagsatzig gfüehrt. S Baselbiet het sich vo dr Stadt drennt, Usserschwyz het sich uf Befähl vo dr Dagsatzig wider mit Innerschwyz vereinigt.

Dr Sarnerbund isch am 12. August 1833 vo dr liberale Mehrheit vo dr Dagsatzig ufglöst worde, wil er nit mit em Bundesvertrag chönni veriibart wärde.

Weblingg ändere