Sanggaller Brodworschd

Dialäkt: Sanggale

S Sanggaller Brodworschd ischt a Brüeworschd us Schwis- und Chalbflaisch und Milch. Hät si im Flaischaatail mindischtens 50 % Chalbflaisch, so sait me re Chalbsbrodworschd. Beedi send 110 Gramm schwäär. Vo de Sanggaller Brodworschd gits zwee grösseri Wariante; d OLMA-Brodworschd ischt 160 g und Sanggaller Chinderfäschtbrodworschd ischt 220 Gramm schwäär.

e paar OLMA-Brodwörschd

Zueberaitig

Wil Sanggaller Brodworschd nöd grüe, aso roh, sondern alewil scho koched verchaufd wörd, chönt me si wie de Särwela chalt ässe, wa aber nöd üblich isch. Si wörd, wies jo de Name scho sait, brötled - seg da i de Pfanne oder öber em Füür. D Sanggaller Brodworschd werd als Biilaag von ere Hoptmohlzit, as Znüüni oder z Väsper gässe. Zun ere griliert Sanggaller Brodworschd ghört es Sanggaller Püürli. Sänf nennt me känn zu däre Grillwoschd, da wär e Belaidigung för jede Metzger oder Worschdstand.

Schutz

Sit em Oktober 2008 isch d Sanggaller Brodworschd offiziell gschützt as IGP (Indication géographique protégée) för de Schwizer Kantoo Sanggale, s Thurgi ond beedi Appezäll iitrait. Sithär dörfid nu no Metzger us däne Kantöön Wörschd as Sanggaller Brodworschd härstelle und o nu dänn, wänn s d Richtlinie vo de IGP iihalted.

Rekord

Im Augschta 1987 ischt a 1293 Meter langi Sanggaller Brodworschd gmacht wore. Si hät damals as längschti Brodworschd vo da Wält en Iitrag is Guinnes Buech vo de Rekord gschafft. Dä Rekord ischt allerdings im 1999 vo Landshueter Metzger öbertroffe worde.

Weblink

 Commons: Schwizer Brodwörscht – Sammlig vo Multimediadateie

• St. Galler Bratwurst i de Datebank vom Kulinarische Erb vo de Schwiz
• d Website vo de Sanggaller Brodworschd