OLMA Schweizer Messe für Landwirtschaft und Ernährung

D OLMA – mit em ganze Titel d OLMA Schwiizer Mäss für Landwirtschaft und Ernäärig isch e Mäss z Sanggalle, wo s um alli mögleche Frooge vom Puure goot.

Gschicht

Die grossi nazionali Verastaltig isch anne 1943 s erschte Mool über d Büüni ggange, und denn no mit em Name, wo OLMA derfür d Abchürzig isch: Ostschweizerische Land- und Milchwirtschaftliche Ausstellung. Scho i de Joor vorhär, zmitzt im Zwöite Wältchrieg, sind z Sanggalle zwöimol Puurenusustellige gmacht worde, anne 1942 im Schützegarten und 1943 i der Toonhalle. Sid dr Usfüerig vo 1946 isch dr Name OLMA, Schwiizer Mäss für Land- und Milchwirtschaft gsi. Dä Name het bis 2003 verhept, denn het me uf s 2004i dr hüt no üblech Name gnoo.

1946 het dr Schwiizer Bundesroot pschlosse, die Sanggaller Mäss heig e nazionali Bedütig fürs Land.

D OLMA isch all Joor im Herpscht. Si foot immer am Donschtig a, wo um Gallustag veruusgoot. Dr Fyrtig vom Sanggaler Stadtpatroon, em heilige Gallus, isch am 16. Oktober.

Theme

Am Afang het d OLMA vier thematischi Schwäärpünkt gha: zum Erschte Milchwirtschaft, zum Zwöite Acher- und Obschtbou, zum Dritte Gwärb und zum Vierte Maschine, Grät und Energy (Gas, Eläktrizität, Füür). D Mäss isch aber ständig gwachse, und hüt richtet si sech an e dütli breiters Publikum. Drum wird hüt au vil mee zeiget: Me gseet zwar au hüt no Chüe und Ross, aber au Rasemääer, Wöschmaschine und Mobiltelifon.

Gescht

D OLMA Sanggalle tuet fascht sid em Afang vo dere länge Fäschtsery immer en Schwiizer Kantoon oder au s Nochberländli Liechtstei als spezielle Gascht ofiziell ylade, und dää präsentiert es par vo sine volkskuntlechen und wirtschaftleche Psunderheiten am Fäschtumzuug, wo dur d Stadt goot. Mit der Zyt händ au wyteri ussländeschi Piet oder anderi nazionali Fäscht oder Tradizioone uff Sanggalen a d OLMA törfe goo. So sind a dr OLMA z Psuech gsi:

1950: s Tuurgi
1951: der Kantoon Schaffhuuse
1952: s Fürschtetum Liechtestei
1953: der Kanton Sanggalle
1955: Uri, Schwyz, Nidwalden und Obwalde
1958: Appezäll Ausseroode und Appezäll Inneroode
1961: Glaris
1962: Uri, Schwyz, Nidwalde und Obwalde
1964: s Fürschtetum Liechtestei
1967: Waadt
1969: s Wallis
1970: Schaffuuse
1971: Aargau
1972: s Tuurgi
1973: Tessin
1974: Graubünde
1975: Glaris und glychzytig dr Freistaat Bayern
1976: Züri
1977: die beide Apezäll
1978: Gämf
1979: Liechtestei
1980: Uri, Schwyz, Nidwalden und Obwalde
1981: Schaffuuse
1982: Basel-Stadt und Baselland
1983: s Tuurgi
1984: Bärn
1985: s Bünderland
1986: Friburg
1987: Glaris und Zug
1988: Soledurn
1989: die beiden Apezäll
1990: Luzärn
1991: der Kanton Sanggalle
1992: Nöieburg
1993: Liechtestei
1994: der Aargau
1995: Schaffuuse
1996: s Wallis
1997: s Bendesland Baade-Württebärg
1998: s Tuurgi
1999: d Stadt Sanggalle
2000: der Kanton Züri
2001: d Landesuusstellig Expo.02 isch yglade gsi
2002: d Region Liguurie (Itaalie)
2003: s Bündnerland
2004: s Tessin
2005: der Kanton Gämf
2006: die beiden Apezäll
2007: die vier Innerschwiizer Urkantöön
2008: s Wadtland
2009: die iteliänische Regioone Südtirol und Trentino
2010: Basel-Stadt, Baselland und der Kanton Jura
2011: Bärn
2012: Zug und Glaris
2013: Soledurn
2014: Luzärn
2015: Aargau
2016: Liechtestei
2017: s Tuurgi
2018: d Fête des Vignerons vo Vevey
2019: d Schwiizer Volkskultur
2021: Schaffuuse
2022: s Bündnerland
2023: Züri
2024: Sanggalle

Weblink

Commons: OLMA – Sammlig vo Multimediadateie

d Website vo der OLMA