Urs Schwaller

De Urs Schwaller (* 31. Oktober 1952 z Fryburg) isch en Schwiizer Politiker (CVP). Er isch vo 2003 bis 2015 Schtänderot us em Kanton Fryburg u vo 2005 bis 2014 Fraktionspräsident im Bundeshuus gsi. Sit 2016 isch er Verwaltigsrotspräsident vo de Schwizer Post.^[1]

De Schwaller isch vo Bruef Rechtsawalt. Er läbt z Tafers, isch ghürote u Vater vo drü Chind.

Politik

De Urs Schwaller isch vo 1986 bis 1991 Oberamtmaa vom Seisebezirk gsi u vo 1992 bis 2003 Fryburger Schtaatsrot. Zerscht isch er Direktor für Inners u d Landwirtschaft gsi, ab em 1996 Finanzdirektor. Im 2003 isch de Schwaller in de Schtänderot gwählt worde und im 2005 zum Präsident vo sinere Fraktion. Bis 2007 isch es d CVP-Fraktion gsi, wo im 2007 um d EVP- und glp-Parlamentarier erwiteret wurde-n-isch. Nach de Wahle 2011 isch d glp us dere Fraktion usgschiide, wil si selber Fraktionsstärki erreichd het. Dafür isch au de einzig CSP-Nationalrot Fraktionsmitgliid vo de noie CVP/EVP-Fraktion worde. De Schwaller het s Fraktionspräsidium im Jänner 2014 abgeh. Sin Nochfolger isch de Filippo Lombardi worde.^[2] Im 2009 isch de Urs Schwaller Bundesrotskandidat gsi, d Bundesversammlig het aber de Didier Burkhalter vo de FDP zum Bundesrot gwählt.^[3]

Vo 2011 bis 2015 isch er ständigs Mitglid vom Europarot z Strossburg gsi.^[1]

Bi de Wahle im Oktober 2015 isch de Schwaller nüme aaträtte.^[4]