Václav Klaus

De Václav Klaus (* 19. Juni 1941 z Prag) isch en tschechische Politiker und Wirtschaftswüsseschaftler. Er isch Vorsitzende vom OF (1990–1991) und vo de ODS (1991–2002) ksi. Zudem hät er die höchste Staatsämter vo de Tschechische Republik kha: Vo 1992 bis 1998 isch er Ministerpräsident, vo 1998 bis 2002 Vorsitzende vom Abgordnetehuus und vo 2003 bis 2013 Staatspräsident ksi. Gmeinsam mit em Slowak Vladimír Mečiar hät er für d Teilig vo de Tschechoslowakei in zwei souveräni Staate zum Jahresaafang 1993 gsorgt.

Läbe

De Klaus isch 1941 im Protektorat Böhme und Mähre uf d Wält cho. I de 1960er hät er studiert und hät sich 1989 a de Samtige Revolution beteiligt, zersch isch er en treue Ahänger vom Václav Havel ksi, hät sich dän aber als Ministerpräsident vo de Tschechische Teilrepublik de Unabhängigkeitsbesträbige vo einige Politiker agschlosse. Wo Tschechie entstande isch, isch de Klaus vo 1993 bis 1998 tschechische Ministerpräsident ksi. I de Wahle vo 2003 isch er am 28. Februar 2003 mit knapper Mehrheit zum Präsidente vo de Tschechische Republik gewählt worde. I de Zit vo sinere Präsidentschaft isch s Land 2004 de EU biträte. Döt hät er starch d Beneš-Dekret verteidigt und hät e europaskeptischi Haltig ka. I de Wahle vo 2013 hät er gäge de Miloš Zeman verlore und isch sitdem nurno im politische Hintergrund aktiv. Während de Krise i de Ukraine hät er e prorussischi Haltig iignoo.

Werk

Europa?, context verlag, Augsburg 2011, ISBN 978-3-939645-35-1.
Blauer Planet in grünen Fesseln. Was ist bedroht: Klima oder Freiheit?, Carl Gerolds Sohn, Wien 2007, ISBN 978-3-900812-15-7.

Weblink

Commons: Václav Klaus – Sammlig vo Multimediadateie

offizielli Website vom Václav Klaus (tschechisch/englisch/deutsch)
offizielli Website vom Präsident vo de Tschechische Republik (tschechisch/englisch)
Jan Puhl: Gewiefter Eiferer; Porträt im Spiegel Nr. 5/2008 vom 28. Januar 2008
Marketa Maurova: Vaclav Klaus – ein Porträt; Radio Prag, 28. Februar 2003