Werner Arber

Dialäkt: Baseldütsch

Dr Werner Arber (* 3. Juni 1929 z Gräniche) isch en Schwizer Mikrobioloog und Genetiker. 1978 het er dr Nobelbriis für Füsiologii oder Mediziin üüberchoo.

Lääbe

Dr Werner Arber het noch dr Matur an dr Alte Kantonsschuel Aarau vo 1949 bis 1953 Chemii und Füsik an dr ETH Züüri studiert. Denn het er am Biofüsikalische Laboratorium vo dr Uni Gämf gschafft und isch dört 1958 bromowiert worde. Dört het er s nöije Gebiet vo dr Bakteriofaagegenetik kennegleert. Er het z Los Angeles an dr University of Southern California (USCLA) gforscht und isch vo 1959 bis 1970 an dr Uniwersidäät Gänf gsi, won er 1965 e Brofässuur üüberchoo het. Sit 1971 het dr Werner Arber as Ordinarius für Molekulaari Mikrobiologii am Biozäntrum vo dr Uniwersidäät Baasel gleert und gforscht. Vo 1986 bis 1988 isch er Räkter vo dr Uni Baasel gsi. Er isch joorelang Mitgliid und Vizebresidänt vom Schwizerische Wüsseschaftsroot und vo 1996 bis 1999 Bresidänt vom Internazionaale Root vo de Wüsseschafte ICSU gsi. 1996 isch er emeritiert worde.

Sit 1981 isch er Mitgliid vo dr Bäpstlige Akademii vo de Wüsseschafte gsi und vom 20. Dezämber 2010 bis am 20. Juni 2017 iire Bresidänt.^[1] Si Komfessioon isch evangelisch-reformiert und er isch sit dr Gründig vo dr Akademii vor über 400 Joor iire erst Bresidänt gsi, wo nit römisch-katholisch isch.^[2]

Wärk

Sini wichdigste Aarbetsgebiet si die bakterielle Restrikzioonssüsteem und beweeglige genetische Elimänt (Inserzioonselimänt, Transposons) und d Modifikazioon und Restrikzioon vo dr Ribonucleinsüüri (RNA) vo Bakterie und Bakteriofaage.

1978 het er zsämme mit em Daniel Nathans und em Hamilton Othanel Smith dr Nobelbriis für Füsiologii oder Mediziin üüberchoo für d Entdeckig vo de Restrikzioonsenzüüm und iiri Aawändig in dr Molekulaargenetik.

Uszäichnige

European Molecular Biology Organization (1964)
European Academy of Arts, Sciences and Humanities (1981)
Foreign Associate of the National Academy of Sciences, USA (1984)
Foreign Honorary Member of the American Academy of Arts and Sciences (1984)
Ordentligs Mitgliid vo dr Academia Europaea (1989)^[3]
Fellow of the American Society for Microbiology (1996);
Associate Fellow of the Third World Academy of Sciences (TWAS) (1997)
Eeredokter vo dr Uniwersidäät Stroossburg
Eeredokter vo dr University of Southern California

Liddratuur

Lazare Benaroyo / MS: Arber, Werner. In: Historisches Lexikon vo dr Schwiiz.
Gisela Baumgart: Arber, Werner. In: Werner E. Gerabek u. a. (Uusegääber): Enzyklopädie Medizingeschichte. De Gruyter, Berlin/ Nöi York 2005, ISBN 3-11-015714-4, S. 92 f.