Andreas Neeser

Dr Andreas Neeser, wo am 25. Jänner 1964 z Schlossrued im Aargou uf d Wält cho isch, isch e Schwiizer Schriftsteller. Er macht au Wärch i dr Mundart.

s Lääbe

Dr Neeser het a dr Uni Züri Germanistik, Anglistik und Literaturkritik studiert und denn langi Zyt as Düütschleerer a dr Alte Kanti z Aarau gschaffet.

Sit 2003 het er s Literaturhaus z Länzbrg ygrichtet und gläitet. Er isch as freie Schriftsteller z Suhr dihäi. Anne 2012 isch er ufs Internazionale Poesiefestival z Medellín yglade woorde. Und er macht bim Verband Autorinnen und Autoore vo dr Schwiiz und bim Düütschschwiizer P.E.N. mit. Es Zytli het dr Neeser im ussland gläbt, öppe z London, z Paris und z Berlin.

Vom Neeser git s es paar Romään und Churzgschichte, Theaterstuck und e Zylete Gedicht. Derzue chöme Leermiddel füre Literaturunderricht i dr Schuel. Teil Stuck vo iim sind vo anderne fürs Theater umgsetzt und uf Musig gsetzt woorde. Musiker, wo em Neeser sine Tegscht für iri Wäärch gnoo händ, sind dr Michael Schneider, dr Aurel Nowak, dr Meinrad Schütter un dr Martin Merker. Drzue ane sind Schrifte vom Neeser in anderi Sprooche übersetzt woorde. Ane 2010 het er uf de Soledurner Literaturtääg us syne Wäärch glääse, und im Septämber 2019 uf de Frauefälder Lyriktääg.

Er het es paar Uuszäichnigen und Prysen übercho, do sind numen es paar drvo: dr Meedieprys vo RAI Booze, 2006; dr Fäldkircher Lyrikprys, 2008; e Wäärchbytraag vo dr UBS Kulturstiftig, 2013; e Wäärchbytrag vo Pro Helvetia, 2014; und es paar Mol het er Wäärchbytreeg vom Aargauer Kuratorium übercho.

Dialäktwäärch

Dr Neeser schrybt au Sachen i dr Mundart. Es sind Gschichtli, Gedicht, Lieder und e Roman. I drüü Büecher verzellt er vom Lääbe vo de Lüüt i verschidene Situazioone, und bsunders immer wider wie s eim im ene Dorf goot; so wott dr Neeser mit synere eigete Mundart und de Wörter us synere Chindheit umgoo, wien er im Gsprööch mit dr Nora Marte ane 2015 gseit het.

S Theaterstuck Geträumt hab ich jede Nacht von dir nimt es Motyv vom Aargauer Schriftsteller Paul Haller (1882-1920) uuf. Und zum Adänke a dää Autoor, wo hundert Joor früener gläbt het, het dr Neeser 2013 e Samelband mit Mundartgedicht und chlyne Dialäkttegscht vo dryssg hütigen Aargauer Dichter usegää: Das Buech heisst Übers Wasser tanzt en Schy und es goot vom Paul Haller sym berüemte Mundartgedicht Z Nacht uus, wo die modärnen Autore füre Neeser drzue öppis eigets sind go schrybe. Dr Haller het i sym Gedicht vo de Gfüel verzellt, wenn er i dr Nacht d Aare aluegt. D Bytreeg für die spezielli Blüetelääsi, wo schynts die erschti aargauischi Mundart-Anthology isch, sind ussert vom Neeser sälber vom Silvio Blatter, em Bruno Bolliger, em Reinhold Bruder, em Markus Bundi, dr Monica Cantieni, em Martin R. Dean, em Matthias Dieterle, em Urs Faes, dr Brigitte Fuchs, em Sascha Garzetti, dr Doris Gautschi, em Daniel Goetsch, em Christian Haller, em Ernst Halter, em Markus Kirchhofer, dr Ana Lang, dr Verena Lang, em Rolf Lappert, em Jörg Meier, em Klaus Merz, em Michel Mettler, em Hansjörg Schertenleib, dr Nathalie Schmid, em Hansjörg Schneider, dr Isabelle Stamm, dr Claudia Storz, em Ernst Strebel, dr Silvia Trummer und vom Matthias Zschokke.

• No alles gliich wie morn. Geschichten und Gedichte. Zytglogge, Oberhofen am Thunersee 2009, ISBN 978-3-7296-0788-0
• S wird nümme, wies nie gsi isch. Mundartprosa. Zytglogge, Oberhofen am Thunersee 2014, ISBN 978-3-7296-0890-0
• Nüüt und anders Züüg, Mundartprosa. Zytglogge, Basel 2017, ISBN 978-3-7296-0955-6
• Luftposcht. Mundart-Chansons. Audio-CD, zäme mit em Michel Erismann. Phonag Records, Winterthur 2012.
• Übers Wasser tanzt en Schy. Mundarttexte zu einem Gedicht von Paul Haller. Katakult. Fabrik für Projektkultur 2013.
• Alpefisch. Zytglogge, Basel 2020, ISBN 978-3-7296-5035-0.

Hochdüütschi Wäärch

• Schattensprünge. Roman. Pendo, Zürich 1995, ISBN 3-85842-286-X
• Treibholz. Lyrik. Zürich 1997, ISBN 3-85842-314-9; Wolfbach Verlag, Zürich 2004, ISBN 3-9522831-6-9
• Schweres Blut. Theaterstück, 2002
• Tote Winkel. Zürich 2003, ISBN 3-9522831-2-6
• Lauter Zwischenton. Meran 2004
• Gras wächst nach innen. Gedichte. Zürich 2004, ISBN 3-9522831-7-7
• Die Sonne ist ein nasser Hund. Zürich 2006, ISBN 3-9523057-2-3
• Schichtungen. Gedichte. Meran 2006
• Grenzland. Ein Klangbuch. Zürich 2007, ISBN 978-3-9523057-4-4
• Mirame!, Kreation der Tanzcompagnie Flamencos en route mit Texten von Andreas Neeser. UA: Theater Casino Zug, 2008.
• No alles gliich wie morn. Geschichten und Gedichte. Zytglogge, Oberhofen am Thunersee 2009, ISBN 978-3-7296-0788-0
• Unsicherer Gund. Haymon Verlag, Innsbruck 2010, ISBN 978-3-85218-635-1
• Giacomettis Bauch. Innenansichten. Innsbruck 2010, ISBN 978-3-85218-685-6
• Fliegen, bis es schneit. Innsbruck 2012, ISBN 978-3-85218-731-0
• Zwischen zwei Wassern. Innsbruck 2014, ISBN 978-3-7099-7132-1
• Wie halten Fische die Luft an. Gedichte. Innsbruck 2015, ISBN 978-3-7099-7219-9
• Ravi und Oli in Grünland. Erzählung für Kinder ab 6 Jahren. Zäme mit dr Lea Guidon, mit Illustrazioone vom Marc Locatelli, Orell Füssli Verlag, Zürich 2015, ISBN 978-3-280-03488-0

Weblink

• d Websyte vom Andreas Neeser
• Markus Gasser: Literatur: Andreas Neeser blickt mit Bubenaugen in seine Kindheit, uf srf.ch
• Nora Marte: Andreas Neeser: «Ich habe seit jeher einfach gerne mit Worten jongliert», 31. Dezämber 2015, uf aargauerzeitung.ch